NATO-i Aegean Sea nung nisung shibelener nokdangtsü mapatong tenzüker

Brussels, February 11 (Agencies): North Atlantic Treaty Organization (NATO)-i Germany, Greece aser Turkey den yariteptsü tangatetba nung Turkey linük tsütsülen Aegean Sea tzüyimkümlen ozüng alema nisung shibenertem nokdangtsü mapatong tanü, Brehostibar nü tenzükba osang ka U.S. Defense Secretary, Ashton Carter-i metetdaktsüogo.

“NATO defense ministers senden ka tanep Brussels nung amenba sülen NATO-i mitkar tayimtsütem yoka Aegean Sea tzüyimkümlen refugee nisungtem ama sayua ozüng alema nisung shibelenertem pua parnok nokdangtsü mapatong tanü tenzükogo,” ta Carter-i sangoktsü.

Germany, Turkey aser Greece linüktemi onük benokba sülen NATO-i tan ozüng alema inyakertem nokdangtsü mapatongji tenzüker lir.

German Chancellor, Angela Merkel-i tan Hombar nü Turkey semdanga Greece densema, par linük asemi tang ajurushia aliba migrant nisung den sentakba timtem NATO nem ajishimdaktsütsü sentong renemba sülen linük 28 züngsemba NATO-i tan nisung shibelener nokdangtsü mapatongji tenzük.

Pei linük toktsür Europe nung jenoka alitsü asoshi apusor migrant nisungtem timbakati Europe nung tetsüng ajemoka Turkey tzüyimkümlen atongba sülen parnoki Greece aser Germany na densema Europe kübok densemba linük balala nung jenoka alitsü merangba ajanga tesüiba mapang, World War II nung ajuruba sülenbo Europe-i tang migrant nisungtem den sentakba khuret tesashitiba ajurutsü tenzüka lir.

Taküm 2016 küm January ita nungi tenzüka tanü tashi nung migrant nisung 70,000 dak temai tzüyim ajangdanga Europe nung tetsüng ajemokba aser nisung 400 shi tzüyim lendong balala nung asüba osang bushitetba osang ka International Organization for Migration (OIM) tentetia metetdaktsüogo.