NATO-i Afghan mitkar 2020 küm tashi yaritsü lemtetogo

Poland yimtiba, Warsaw nung amenba NATO Summit nung shilem agir, US Tir, Barack Obama (Abelen)-i Afghanisan Tir, Ashraf Ghani den teka amtepa ajurutepdang agiba noksa ka yangi angur. Ghani anasa NATO Secretary General, Jens Stoltenberg (Achililen) aser Afghanistan’er Chief Executive, Abdullah Abdullah na nokdaka aliba noksa nungsa angur. (Warsaw, July 09)

Warsaw, July 09 (Agencies): Alima linüktemi lokteper tentetba tongti tentet, North Atlantic Treaty Organization (NAOT)-i kümshi dollar sen billion 1 agüja taruba mapang, 2020 küm tashi Afghanistan mitkartem yaritsü telemtetba ka tanü, Honibar nü agiogo.
Ano, ochimashi anema raratsü, election den sentakba temelenshi agitsü aser meimchir temeten kümzüka ayutsü atema Afghan lenirtem ajungshitsü asoshi yashi, Hokolbar nü nungi tenzüka Poland yimtiba, Warsaw nung senden amener NATO lenirtemi bangjemba osang ka NATO Secretary General, Jens Stoltenberg-i tanü sangoktsü.
NATO tenteti 2003 küm nungi tenzüka tanü tashi nung Afghanistan tensa tajungba kümdaktsütsü nükjidong nung Afghan sorkar yariba den külemi, par linük nung yimji yimjung tia lidaktsütsü atema sena dollar sen billion jenti indokba osang bushiteta lir.
Küm ishika amakba lendong matalokdaktsüi arur külen Taliban teloki tanaben amakba lendong balala atalokdakja Afghanistan nung tensa taoba mapang ama mejungi tawa kümdaktsütsü tenzükba osang bushitetogo saka West-i taoba mapang amabo Afghanistan nung Taliban telok den raratsü mejangrai akümtsü tenzüka lir.
Ano, Islamic State (IS) densema, kiralongrar telok balala anema takok ngua raradaktsütsü nükjidong nung NATO-i par mitkar terenemshidak Iraq nung tenteta, idakji terenemshitsü agidaktsütsü onüka benokba osang angazükogo.
Tanü tashi nung US mitkartem densema, teloktep NATO mitkar züngsem 13,000 shi Afghanistan nung yuja lir.
Resolute Support ta ajaba mitkar mapatong nung Germany, Turkey aser Italy nungeria par mitkar züngsemtem yoka Afghanistan mitkartem nem tongpang raratsü terenemshiba agüja, Afghanistan sorkar den yaritepba osang bushiteta lir.