Brussels, August 10 (Agencies): North Atlantic Treaty Organization (NATO) tenteti Tir, Recep Tayyip Erdogan aser pai aniba Turkey linük pusemtsü tenangzükba olen ka NATO otongdar, Oana Lungescu-i tanü, Bodbar nü metetdaktsüogo.
West-i par linük pusemtsü memulunger ta mepelaba olen ka Turkey sorkari sangoktsüba sülen alima linük 28 züngsemba NATO-i Turkey linük züngsem tajung ka ama züngshir ta nenshia metetdaktsütsü nükjidong nung Lungescu-i tanü iba olenji sangoktsü.
“Turkey linük ya NATO’er mapatong ajunga nung yaritepba linük ka lir aser NATO-i agiba telemtetba ajunga nung par linüki tongti shilem agir. Tarutsü mapanga Turkey linüki NATO den yaritepa, NATO mapatong ajunga nung tongti shilem agitsü imlar,” ta lai ashi.
Turkey’er mitkar telok kati linük indang yimsüsütsü tashi tashiyim agi tamakok ngua agitsü merangba sülen iba ken o nung NATO-i par Turkey linük menungitba olen ka Turkey-i metetdaktsü aser iba nem telangzüba agüja, Lungsecu-i tanü NATO-i Turkey linük pusemtsü tenangzükba olenji metetdaktsür lir.
“Mitkartemi Turkey linük indang yimsüsütsü tashi tashiyim agi agitsü merangba aonungsa NATO Secretary General, Jens Stoltenberg-i Turkey Foreign Minister aser Tir Erdogan na den tongtepratepa, Turkey sorkar anema nokdaker aitsüba aser NATO-i maneni Turkey pusemtsü renema aliba osang lemsatepa liasü,” ta lai osang jangjashitsü.
Tir Erdogan-i Russia kübok St. Peterburg yimti nung Russia Tir, Vladimir Putin den yashi, Mongolbar nü ajurutepa par linük anati tanaben sentaktepshi nangzüktepba sülen Turkey-i West den tesendaktep junga mayutsü akok ta alima talisa, West lenirtemi tebilemtsü akatsü tenzükogo.
Middle East nung tensa mejungi alibaren azüoktsüren nung Turkey linüki tongti shilem agiba yong NATO nung züngsemba linüktem rong nung mitkar tulutiba alir linük tarensen nung tanabuba, Turkey ya West atema tongtipang linük ka akümer.
Mitkartemi Turkey yimsüsütsü tashi tashiyim agi agitsü merangba sülen par Turkey linük mepusemba ken o nung ajemdaker, Erdogan-i US aser European Union (EU) na kanga sashia aitsüogo aser aibelener nem tasüba temerenshi agütsübaren tanaben tenzükshitsü densema, aibelener anema kanga sashia nokdaktsü tenzükogo.
You must be logged in to post a comment Login