NATO-i Russia den kidangsüa aliba linüktem yaritsü nangzüker

Brussels, October 27 (Agencies): North Atlantic Treaty Organization (NATO) nung züngsemba linüktemi Russia den kidangsüa aliba NATO linüktem nem tongpang nung amshitsü osettsüset agütsüba den teloktep mitkartem tsüngdong yoka yaritsü tenangzükba ka agiogo.
Russia den tensa mejungi akümtsü tenzükba mapang ka nung NATO tenteti külem züngsem linüktem den yariteptsü asoshi tan nangzükteper lir.
NATO nung züngsemba linüktem nungi defense minister-temi par tesepti, Belgium yimtiba, Brussels nung senden ka amendang tan tenangzükbaji agiba osang jangjaogo.
Russia-i tongpang nung amshitsü cruise missiles abenba tongpang nung amshitsü warship rong 2 tashi Denmark aser Sweden na tsüngda, Baltic Sea-i yokba osang bushitetba olen ka NATO Secretary General, Jens Stoltenberg-i tan senden nung metetdakja, Russia-i par mitkar tashi amshia, kidangsüa aliba linüktem amokmerentsü tenzükba osang lemsatepa liasü.
“Russia-i kidangsüa aliba linüktem amokmerentsü tenzüka lir aser Baltic tesem nung tensa azüoktsüji asen NATO khuret lir. NATO-i Russia den angatetteptsü temulungtetba yua lir saka nungdakra, asen tenteti par linük den tongpanga raratsü renema lir,” ta pai senden nung sangoktsü.
NATO-i Baltic region kübok densemba aser Russia den kidangsüa aliba Poland, Lithuania, Estonia aser Latvia linüktemi par teloktep mitkartem tsüngdong yokba den nisung meneni yimzüdaktsüba drone tayimtsü, mitkar tayimtsü aser tank-tem densema, tongang nung amshitsü mitkar osettsüset yoka, item linüktem Russia’er mitkar tashi nung kümzüka ayutsü renema lir.