NATO o Russia lenirtemi teloktep senden amen

Brussels, April 20 (Agencies): North Atlantic Treaty Organization (NATO) aser Russia lenirtemi NATO tesepti, Belgium yimtiba, Brussels nung teloktep senden ka tanü, Bodbar nü menogo.

Tan senden amenba ya 2014 küm sülen NATO-Russia Council senden tan mezüngsüa amener lir.

“Tanü senden nung shilem agirtemi Russia aser United States (US) na tsüngda tesendaktep mejungi akümba onük benoka jembiogo,” ta NATO Secretary General, Jens Stoltenberg-i osang jangjashitsü.

Baltic Sea nung duty inyakba US Navy tongpang rong ka anasa Russia-i par mitkar jet tayimtsü ka taoba hopta yimzüdaktsü sülen Russia aser US na tsüngda tesendaktep taoba mapang nungi tamajungba akümba osang bushiteta lir.

“Alima linüktem rong nung tesendaktep raksa tensa mejungi kümdaktsüba mangatettepbaren ajunga jembitepba ajanga bentettettsü ta tangatetba nung tanü senden nung shilem agirtemi US aser Russia na den sentakba onükji benoka jembi,” ta Stoltenberg-i ashi.

Russia telok densema, NATO nung züngsemba linük 28 nungi ambassador-temi tan senden nung shilem agiba osang jangjaogo.

Ano, Russia-i par mitkar tayimtsütem yoka Syria nung bomb-tem tsükdakja lendong atalokdaktsüba aser par linüki Ukraine ket nungi Crimean peninsula tashiyim agi agia tensa mejungi kümdaktsüba onüktema tan senden nung benoktsü renema lir.

Russia-i tashiyim agi Crimean peninsula agiba den külemi, par mitkartem Ukraine-i tsüngdong yoka Ukraine sorkar anemertem yaritsü tenzükba sülen NATO aser Russia na tsüngda tesendaktep mejungi akümtsü tenzük.