NATO Summit nung IS, Russia & Afghan tongpang onük benoktsü

Pentagon, July 07 (Agencies): North Atlantic Treaty Organization (NATO) lenirtemi asüng, Hokolbar nü nungi tenzüka Poland kübok Warsaw yimti nung anogo 2 tashi amentsü ayongba NATO Summit senden nung Afghan mitkar maneni yaritsü, Islamic State (IS) kiralongrar samatsütsü aser Russia-i tashiyim inyakba maparen nokdangtsü onüktem tongtipangsüa benoka jembitsü renemogo.
US-i Afghanistan sorkar maneni yaritsü nükjidong nung par mitkar züngsem 8,400 tashi Afghanistan nung maneni yutsütsü osang sangoktsüba mapang ka nung NATO-i par senden amentsü ayonger lir.
“US mitkar timbaka Afghanistan nungi anitetadokba sülen Afghanistan linüki ajurutsü tenzükba timtem khuret agientsütsü asoshi NATO lenirtemi tebilemtsü akatsü tenzükogo,” ta US Center for Strategic & International Studies nung ketdangser, Anthony Cordesman-i metetdaktsü.
Paisa ashiba agi, alima teloktep mitkartemi küm 10 dak tema yariaka, Afghan mitkartemi telungpur aser kiralongrar madak tanü tashi takok monguteti lir.
“Afghanistan mitkar aser police jenjang tajungba kümdaktsütsü asoshi NATO lenirtemi Afghanistan nem nungdakba senotsü teyari tarutsü mapang, 2020 küm tashi agütsütsü telemtetba par tesüsaba senden nung agitsü nungdaka lir,” ta US’er NATO Ambassador, Doug Lute-ia metetdaktsü.
Russia-i tashiyim agi Ukraine ket nungi Crimea peninsula agiba den külemi, par mitkar aser tongpang osettsüset yoka Ukraine sorkar anemer pusema yariba ajanga NATO-i par tentet nung züngsemba aser Russia den kidangsüa aliba linüktem kümzüka alitsüsa tang tensa ajurua lir.
Ano külen, NATO anema nokdakertem azüoktsü aser nungdakra, parnok den tongpanga raratsü nükjidong nung US, Britain, Germany aser Canada nunger densemba NATO linüktemi Russia den kidangsüa aliba linüktem nung NATO mitkar battalion 4 tashi yutsütsü sentong renemba osang angazükogo.
Iba den sentaktepba, US-i par mitkar battalion ka Poland nung ayutsü renemba osang US Tir, Barack Obama-i tan NATO senden nung sangdongtsü renema lir.
Ano, Britain, Germany aser Canada linüktemia par mitkar batallion kaka Estonia, Latvia aser Lithuania nung yutsütsü renemba osang angazükogo.