Natwar Thakkar nem “Karmyogi Award 2015” agütsü

New Delhi, Sep 13 : Chuchuyimlang nung lia Mahatma Gandhi-i sayuba lenmang nung nübortem peisasa inyaker chiyonga alitsü sayuba den India telongjem asoshi tetsübutsü tensa tia ajak tizükteta inyakba mapatem reprangteta tanü Deobar nü Natwar Thakkar nem “Karmyogi Award 2015″ agütsüogo.
Iba sempet ya Mumbai nung tenteta aliba mulungtet telok (NGO) ka tenüng agi ” My Home India” teloki BJP tir Amit Shah nem agütsüdaktsü.
Iba sempet agütsüba sentong nung jembidang, India den North East külemi alitsü asoshi RSS teloki kanga meranga inyakogo ta BJP tiri RSS telok nüng sanga metetdaktsü.
Mahatma Gandhi-i linük nung lanur aika mulungjang nung nübortem asoshi inyaktsü tangatetba aser tejangraba agütsüba ama Natwar Thakkar taküm nungia lanurtemi linük asoshi inyaktsü angazüka inyaktsüla ta Amit Shah-isa metetdaktsü.
Gandhi sülen anidakba nütsüng, Thakkar ya Chuchuyimlang nung lia Northeast nisungtem asoshi inyak tenzük. Pa ya India nung mezüng ato kilonser Jawaharlal Nehru aser mezüng lenirtem den külemi inyaka aruba nisung ka liasü.
Pa leniba nung Chuchuyimlang nung mapa tapu balala inyak sayuba vocational training school, primary schools, medical centres, libraries aser computer centre lapoka lanurtem nem mapa inyak angazükdaktsür aser aluyimba mapa, totzü menüngba, biogas plants, mechanised carpentry shops aser khadi ayokdak lapoka yimtaklirtem dang tangar dak menendaki peisasa taküm lia aotsü lenmang aika sayur.
Linük nung nisung aikati yimten nüjiso atema taküm bendanga agütsüogo aser Thakkar ama nisungtemi linük asoshi taküm bendanga agütsür ta Amit Shahisa metetdaktsü.
India den mepilai Northeast sendaktepa yutetba atema kija ase lokti nüng sanga jembidang, RSS teloki kanga junga inyakogo ta nie nümadanga shitetter ta BJP tirisa metetdaktsü.
” Northeast nung toklang inyaker RSS pracharaks 272 liasü, aser parnok rongnung nisung teri taküm tenla agütsü. Parnok ter rongnung nisung pezübo Tripura nung mapang talangka pua yur tepset. RSS teloki inyakba ngur lokti tentet aikati nübortem asoshi inyak tenzükogo,” ta Amit Shah-isa metetdaktsü.
” Item taküm bendanga agütsürtem nem tanü Natwar Bhaai tushiba anogo nung kü mulungjang taroktiba nungi aküm agütsür,” ta paisa ashi.
Ato kilonser Narendra Modi-ia Gandhi’er nütsüng Natwar Thakkar nem tenüngsang agütsüba osang ka nung, Thakkar-i inyakba mapa ajanga nisung aika mulungjang nung nübortem asoshi inyaktsü ajungshitsü ta metetdaktsü.
Natwar Thakkar ya tang arishi küm 84 lir aser pa ya Padma Shree naroküm anguba lenir ka lir. Tanü pa tushiba sentong nung Union Minister of State for Home Affairs Kiren Rijiju-a dena liasü.
Thakkar Nagaland nung aliba mapang yimten tensa tamajung nung aiben merenshidaktsü saka pai item ajakji tizükteta Gandhii sayuba lenmang nung takok ngua jajaa aruogo. Pa ajanga yimtaklirtem libaliro melenshia taküm tajungba kümdakja anitetba onoki nguogo, anungji onoki pa tushir ta ‘My Home India’ telok nung tongtiba Sunil Deodhar-i metetdaktsü.
Natwar Thakkar nem Padma Shree naroküm ya taoba NDA sorkar mapang agüja liasü. Pai Chuchuyinlang nung Nagaland Gandhi Ashram tenzük.