Navjot Singh Sidhu-i ‘Awaaz-e-Punjab’ Party tenzükogo

New Delhi/Chandigarh, September 08 (Agencies): Cricket asayar nungi yimtenren nung ajemoksang, Navjot Singh Sidhu-i Brihostibarnü Chandigarh nung yimtenren party tasen, ‘Awaaz-e-Punjab’ tenzükogo.
Chandigarh nung osangbenertem den mapang tatsüka jembidang pai, “Iba ama mapang ka nung ‘Awaaz e Punjab’ ya party ka masü, saka sabang ka lir. Iba state (Punjab) nung  temelenshi, shia-aruba aser asentenshitsüji Awaaz-e-Punjab nükjidong lir,” ta metetdaktsü.
Taküm July 18 nü Sidhu-i Rajya Sabha MP menden toktsü, aser pa Aam Aadmi Party nung adentsü südi ta bilema liasü, ajisüaka tanü pai AAP tongti lenir, Arvind Kejrwal aser BJP naprong aija jembiogo.
Sidhu-i ashiba agi, “Kejriwal-i kü dang election nung tetoktep (Punjab elections) saka nü kinüngtsü dang toktepdakjang ta ashi. Onoki la minister kümdaktsütsü ta ashi.”
AAP tongtii ‘ajak nung hai’ ta ashitsüpurtem dang aginer, ta Sidhu-isa aitsü.
Taruba Punjab election nung AAP-i tang sorkar tashi nung aliba Akali-BJP teloktep aser Congress den tokteptsü renemba mapang ka nung Sidhu-i party tasen tentetogo.
August ita nung Sidhu-i AAP lenir  Kejriwal ajurua pa AAP nung adentsü atema jembia liasü. Iba sülen August 19 nü Kejriwal-i, cricket asayar nungi yinmtenren nung ajemoksangi mapang nüngdaker, ta metetdakja liasü.
Sidhu-i,  pa Rajya Sabha nung anenbaji Kejriwal ajanga masü, ta ashi.
BJP aitsüba olen ka nung Sidhu-i, India nung lenir tajungtem kanga ajema kümogo aser ola madokertem aika kümogo, ta ashi.
“India nung sobaliba ka lir, nisung tajungertemji decoration ama ayur, aser election nüboyim atema dang amshir,” ta Sidhu-i ashi.
September 2, 2016 nü taoba mapang Rajya Sabha MP, Sidhu-i ‘Awaaz-e-Punjab’ front tenzüktsü ta sangdonga liasü. Iba party-i sangküm küm tetenzüklen agitsü aliba Punjab assembly elections nung tokteptsü.
Iba front tasenba nung tangartemji- Punjab sorkar tashi nung aliba Shiromani Akali Dal MLA aser taoba mapang Indian hockey team captain, Pargat Singh,  independent MLA ana- Balwinder Singh Bains aser Simarjeet Singh Bains nunger lir.
Taoba ita Pargat Singh ya Akali Dal nungi anendakja liasü. Bains adianu anati küm asem tejaklen Akali Dal tokja liasü aser Ludhiana district nung tena pusemertem jenti lir.
Iba Fornt tasenba-i state nung temesepba mozü anema raratsü, ta Sidhu-isa ashi.
Pai, “Saisaponger jenti adokdaktsütetba Punjab to tang kong ali ? Tanübo yimti lenmang sünga mozü achirtem lir,” ta ashi.
State nung assembly menden 117 atema sangküm January mesüra February ita nung election agitsü.