Navy-i tzümetsüng agi kongshir alir nisung 14,000 kümzük

Panaji, Luroi/August 13 (Agencies): Indian Navy-i taoba anogo tenet tsüngda Maharashtra, Goa aser Karnataka kübok tzümetsüng agi kongshir aliba tesem nungi nisung 14,000 dak tema kümzükogo, ta ketdangser kati Mongolbarnü metetdaktsü.
‘Varsha Rahat’, operation kübok Navy team 41, tsüngsang kanga majungba aser tekümzükba maparen inyaktsü asoshi alinük agi memelaba tesemtemi yokogo, kong parnoki advanced light helicopter aser rong amshia nisungtem kümzüker, ta paisa ashi.
“Küm 30 tsüngda tang inyakba inyakyim ama tang tashi nung khen danga inyakdanga mali aser onok team-i Maharashtra aser Goa nung tzümetsüng agi kongshir aliba tesem nungi nisung 11,124 aser Karnataka nung nisung 3,115 kümzükogo,” ta Rear Admiral Philipose Pynumootil, Flag Officer Commanding Goa Area-i osangbenertem dang ashi.
Navy tayimtsütemi Karnataka nung relief material seret 1,305 aser Maharashtra nung seret 1,890 tsükdaktsüogo aser iba ajanga tzümetsüng agi kongshir alir nisung 5,000 shi nem teyari agütsüogo, ta pai ashi.
Navy team ya Maharashtra kübok Kolhapur aser Sangli district nung, Karnataka kübok Belgaum aser Hampi nung aser Goa nung Mapusa, Pernem, Karnali aser Narela tesem nung amendaker lir.
Goa nung amenoker aliba Navy-ia tzütelung nung tzüwar mongin densema sepai 40 anioker team trok Kolhapur nung inyaksangshidaktsüdar aser North Goa district-ia tzüwar parnok 12 yokogo, ta ketdangseri ashi.
August 7 nungi tang tashi nung Belgaum aser iba temeket tesem nung helicopter temi tekümzükba maparen 17 ben tashi inyakogo aser iba mapang nisung 2,517 kümzükogo. Parnok rongnung nisung 138 advanced light helicopters amshia metongteti aliba tesemtem nungi kümzükogo, ta paisa ashi.
Iba dak alia Dornier aircraft-i relief operation nung teyari agütsüogo.
Kolhapur nung tayimtsü anendak ya tenem nung lir asünung iba tesem ya tekümzükba maparen balala inyaktsü asoshi tamendakdak kümdaktsür inyaksangshidar.