Nawas Shariff-i ISI, Pak army mazüokteter: Swamy

New Delhi, February 05 (Agencies): Pakistan sorkari Jamat-ud-Dawah (JuD) tongti Hafiz Saeed mazüoktetba aija tanü Bharatiya Janata Party (BJP) lenir, Subramanian Swamy-i, Pakistan Ato kilonser Nawaz Sharif-i par linük nung atalokbatem mazüokteter, ta ashi.

“Nawaz Sharif ya tashi maliba aser tetezü maketba noksa ka dang lir aser ISI den Pakistan Army naprong Hafiz Saeed (JuD tongti) kübok lir,” ta Swamy-i New Delhi nung osangbenertem dang ashi.

26/11 Mumbai amakba tongti aibelensang Hafis Saaed dak sentakba ken o nung Pakistan nem temepishiba agütsütsü menüngdaker, kechiyong Pakistan sorkarji tashi mali, ta paisa ashi.

“Hafiz Saeed-i maneni India nung azü tokshidaktsüba ya tejashitsüka,” ta BJP lenir Swamy-isa ashi.

Tawa JuD tongti Saeed-i sangdong ka ajanga kiralongrartemi maneni India amaktsü ta metetdaktsüogo.

“Nenoki Pathankot khen amakba dang angu. Ao aiben amaktsüji mela-melar,” ta Pakistan-occupied Kashmir (PoK) nung lokti senden ka alidang Saaed-i ashi.

Saaed-isa, India nunger sepaitemi maneni Kashmiri nunger jenti tepseter. “Parnok defence atema Pathankot amakba yimya nung amaktsü parnoki makoker asü (?)” ta ashi.

Yashi Ministry of External Affairs (MEA)-i, alima ajaklen kiralongrar ta züngshiba International kiralongrar Saeed-i maneni sademsadema Pakistan nungi kiralongraba mapa inyaker, ta shiogo.

MEA official otongdar Vikas Swarup-i, “Pai par tentet balalai teyari maparen inyaker ta asübaji par mapa tamajung nembanger dang. Parnoki kiralongraba mapa inyaker aser kiralongraba mapa atema senotsü agütsür, Hafiz Saeed ama nisung ka aser pa den külemi inyakertemi maneni parnok maparen sademsadema inyakba ya ajak asoshi tebilemtsü ka lir,” ta ashi.