Nawaz Sharif-i memunui army chief tasen shimtsü

Islamabad, August 14 (Agencies) : Pakistan Ato Kilonser Nawaz Sharif-i memunui general pezü rongnungi army chief tasenba shimtsü, aser iba ketdangserji India aser Pakistan tebilemtsü nung jangrar ka asütsüla, ta Deobarnü osangkaket ka ajanga metetdaktsü.
Tang General Raheel Sharif-i ama aliba meden melenzüktsü atema temsüa alir general pezüji Lt Gen Zubair Hayat, Lt Gen Ishfaq Nadeem Ahmed, Lt Gen Javed Iqbal Ramday aser Lt Gen Qamar Javed Bajwa nunger lir, ta Dawn osang ajanga metetdaktsü.
Ato Kilonser Nawaz Sharif den tajung majung ajak lemsaba yimsüsür kati Ato Kilonseri pa den mapang shia ajurutepa aser asüngdangtepa inyaker aser yimsüsüba tsütsü terenlok bentsür arur ang ka shimtsü, ta ashiba iba osangkaket nung metetdaktsü.
“Ibaji atema Ato Kilonseri intelligence osang nung shia alibatem dak ajemdaker inyaktsü,” ta Dawn osangkaket nungsa shia lir.
Iba den külemi ano iba menden atema tokteper dak foreign policy inyakyim tsütsü tejangraba koba tashi lir ibajia reprangtsü, balakata India den tebilemtsü, aser Ato Kilonseri par pezü shia den ibai atema chitepa ajurutepa jembitsü, ta kasa osangkaket nung lir.
“Gen Raheel Sharif-i pa mapa nungi anener külen pa indang tamajung mejembidaktsüner aser Ato Kilonser-i ashiba angadang iba mendeni yokba maparen nung ‘seniority’ tarensen meraksadaktsüner,” ta anisüngzüker aliba general kati ashi.
Lt Gen Hayat ya artillery department nungi lir aser tang general staff (CGS) nung tekolakba lir. Pa tebu-a major general nung lia mapa nungi anisüngzük aser pa adianu ana tashi tang general teinyakdak lir.
Lt Gen Nadeem Ahmed ya tang Multan corps nung commander aser pa Azad Kashmir Regiment nungi lir.
Lt Gen Ramday-i tang Bahawalpur corps anir aser pa tesüiba mapang nung National Defence University, Islamabad Tir liasü.
Lt Gen Bajwa dang ‘dark horse’ ta ajar aser pa ya kanga junga mita atatsüla nisung ka lir, ta Dawn osang ajanga ashi. Pai Kashmir aser linük anüdoklen aliba tesemtem indang tebilemtsütem nung tajangshiba aika lir aser kanga junga meteta lir.
Parnok pezüprong ya tetemsü nübu tesa lir anungji shiba ang shimtsü-ar mejangjateter.
Gen Raheel Sharif ya November tatemlen mapa nungi anisüngzüktsü.