Nawaz Sharif-i PML-N tir inyaktsü akok

Islamabad, September 30 (Agencies): Pakistan prime minister menden nungi anentsüba Nawaz Sharif-i taruba hopta par PML-N party tekolak menden angutsü akok.
Taküm July 28 nü Panama Papers ken o nung Supreme Court-i prime minister menden nungi anentsü tetuyuba agütsüba sülen rishi küm 67 tain Sharif-i Pakistan Muslim League-Nawaz (PML-N) tekolak bena aliba yutsütsüsa aküm.
Parliament nung temaba menden, Senate-i September 27, 2017 nü Electoral Reforms Bill 2017 agizük aser iba nung civil servant ka dak alaka nisung mashii kati party len anitsü akok ta melenshia lir.
Iba ozüng tasen nung parliament züngsemtemi dang yimten telok len anitsü akok ta shia aliba telemtetba agienogo.
Iba ozüng tasenbaji taruba Hombarnü National Assembly nung benoktsü aser melamela agizüktsü kechiyong house nung PML-N pur teimba lir, ta Minister for Climate Change Mushahidullah Khan-i Honibarnü metetdaktsü.
Parliament nung house anapronglai agizükba sülen bill ji Tir dangi abentsü aser pai agizüka sign asüba sülenbo ozüng akümtsü.
PML-N General Council pur October 2 nü senden ka amentsü aser idangji party temzüng melenshitsü. Parliament nungi anenja aliba nisung kati party office nung mapa meinyaktsü ta lateta ozüng agientsü, ta Mushahidullah Khan-isa metetdaktsü.
General Council majurutepdang PML-N central working committee (CWC) pur tama ajurutepa iba onük lemteptsü. Iba sülen CWC aser General Council nati October 3, 2017 nü Tir tasen shimtsü.