Nawaz Sharif kodanga election nung shilem magidaktsütsü

Islamabad, Rongchii 13 (Agencies) : Taoba Pakistan Ato Kilonser, Nawaz Sharif nem masü tashi nübur tenzükba mapa kecha meinyakdaktsütsü aser election nunga shilem magidaktsütsü züngzüktsüogo.
Pakistan Supreme Court ajanga ashiba agi, linük Temzüng Arrla 62(1)(f) nung ajemdaker merenshibajibo taküm piyong atema asütsü. Tanü Rogonü pa nem agütsüba temerenshi zünga metetdaktsüba mapang nisung pongu agi akümba Pakistan Supreme Court bench ajanga ashiba agi, yamala temerenshi agütsübaji democratic inyakyim alidakbo timdang lir.
Sharif aser Pakistan Tehreek-e-Insaf (PTI) telok nung taoba secretary general Jahangir Tareen naprong nem kasa temerenshiji agütsür. Chief Justice Saqib Nisar aser Justice Sheikh Azmat Saeed, Justice Umar Ata Bandial, Justice Ijazul Ahsan & Justice Sajjad Ali Shah ajanga tang obendang agütsüba jagi Pakistan yimtenren nung tuluka kongshitsü.
Parliament züngsem kaji “sadiq & ameen” (ochishir aser nünurtem tsüngdang tagizüktettsü) asütsüla ta Arla 62(1)(f) nung shia lir aser iba kasa arla nungji ajemdaker Panama Papers ken o nunga 2017 küm Chiteni (July) 28 nü Sharif nem Justice Asif Saeed Khosa-i anir nisung pongui akümba SC bench ajanga aitsü.
Kasaji Pakistan Tehreek-i-Insaf (PTI) lenir Jahangir Tareen nema 2017 küm Luchii (December) 15 nü aitsü aser tang ibaji mapa küma inyaker.