Nawaz Sharif ochimashi ken o tasembuba nung aija lir

Islamabad, October 20 (Agencies): Flagship Investment aser bendang linük nung company balala dak sendakba ken o nung aija alisang aser taoba Pakistan Ato Kelonser Nawaz Sharif nem anti-corruption court ka ajanga Hokulbanrü aitsüogo.
Nüburtemi meteta Nawaz Sharif indang rongsen aruba dak alia rongsen bendena aliba ken o nung pa meliaka pa tenüng nung adensang Zafir Khan tsüngdang National Accountability Court ajanga Sharif aitsüba obendang zünga ashi.
Sharif tai mali, ta Khan-i ashi. Sharif ya tang London nung pa kinungtsü Kulsoom Nawaz cancer treatment agitsü asoshi oa lir. Sharif’er tanur Hussain aser Hassan na ya jenshia senzür, ta sangdongogo aser tena ya court nung madenba mechi iba obendang ya agütsü.
Panama Papers ken o nung Supreme Court-i obendang agütsüba nung ajemdaker September 8 nung National Accountability Bureau (NAB) ajanga senotsü ochimashi amshiba ken o asem tashi benokba lir.
Pakistan nung court temaba ajanga Sharif ya Ato Kelonser mapa inyaktsü metemsü, ta July 28 nung obendang agütsü. Pa ya October 22 nung Pakistan-i meyiba arutsü lir aser pai item ken o anema nokdaktsü, ta nangzüka lir.
Taoba ato kelonser ya Azizia Steel Mills aser Avenfield ki-o-jen ken nung Brehostibarnü aitsü aser par jala Maryam Nawaz aser la kinüngbu Captain Mohammad Safdar ya Avenfield ken o nung aija lir.
Sharif ya pa anema benokba ken o asemprong nung aitsüogo aser ken o asemprong nung par tanur Hassan aser Hussain na prong aija lir, saka parnok ken o mapang balala nung jembitsü.