NAYO-i total lockdown masütsü mepishir

Kohima, August 3 (TYO): Kohima District Task Force-i Kohima ajunga shibangtsü lemtetba ya loktiliba atema majung anungji state sorkar aser DTF-i iba telemtetba meyipa reprangshitsüla ta Northern Angami Youth Organisation (NAYO)-i Hombarnü metetdaktsü.
Kohima nung tanü agi anogo 10 buba total lockdown süogo.
COVID-19 anema rara nung NAYO-i frontline workers, Police aser administration pusema nungiter. Ajisüaka, Kohima DTF aser sorkari state yimtiba ajunga shibangba atema tebilemtsü abener, ta NAYO-i sangdong ka nung ashi.
Kohima ajunga shibangba ajanga senso aika mapa inyakdak mali kümogo aser külen shishilembartemi kechisarena ajak nung jenjang atuba ajanga nübortemi timtemer, ta NAYO-i ashi.
“Iba inyakyim ya aitsür aser shishilembartemi kanga dang kümdang inyaktsü metetdaktsür. Volunteer temia pei pei kiyong nung KMC-i latettsüba jenjang nung yokyayokji asütsü atema reprangshimtsü tuyur,” ta by NAYO tir Roko Angami aser tongti tezülur Ruokuoneitso Kire nati ashi.
DTF-i kiyongtem nung dokan kar dang lapoktsü melaba maparen khen meyipa reprangshimtsüla kechiyong iba ya tejak repranga inyakba dang masü saka shishilembabaren nung tim masüba mapa inyakdaktsür, ta NAYO-isa metetdaktsüogo.
COVID-19 anema rara nung NAYO-i pusema nungiter saka sorkar aser District Task Force-i iba onük atema shisadangtsü aser total lockdown melena tanga lenmang ka bushiteptsü ayongzüker, ta parnokisa ashi.
“Lockdown ajanga nisungtemi timtem ajuruba dang masü saka ozüng alema mapa inyakba, auyaba tali bulua kümdaktsüogo. Kohima SP lenisüba kübok police-i mapang shitak nung teinyaktsü inyakba atema tenüngsang agütsür aser police-i ozüng alema inyakba maparen anema raraba nung NAYO-i pusema nungittsü,” ta Roko Angami aser Ruokuoneitso Kire nati metetdaktsüogo.