NBA Academy India atema asayar 24 shimtetogo

New Delhi, February 11 (Agencies) : Tanü Honibarnü New Delhi nung Worldwide Group (ACG) Jump National Finals asayatem nung asayartem rongnungi National Basketball Association (NBA) atema asayar 24 shimtetogo.
Tanü shimteta aliba parnok asayar nisung 24 ya NBA Academy India ajanga scholarship aser training agütsütsü.
February 09 nungi 11, 2017 tashi asayaba National Final asayatem nungi shimtetba nisungtem ya ita asem tashi Mumbai, Delhi, Ludhiana, Kochi, Chennai aser Kolkata yimtitem nung asayaa liasü.
“ACG-NBA Jump asayamung ajanga India nung basketball asayar lanurtem nem saisapong ajanga parnok taküm anisüngzüka litettsüsa maongka lapoktsür. Iba sentong ya taruba kümtem nungi ano tali renloka aotsü asoshi onoki meranga inyaktsü,” ta NBA India nung Managing Director Yannick Colaco-i ashi.
“Basketball asayar parnok nisung 24-i iba asaya nung mongin küma asayatsü asoshi ibai parnok atema sabang tajung lir. Iba sentong ajanga linük nung mejangjai aliba basketball asayartem nem lenmang lapoktsütsü,” ta ACG Director Karan Singh-i ashi.
Parnok nisung 24 nem Delhi National Capital Region (NCR) nung aliba basketball training center, NBA Academy India-i scholarships aser training agütsütsü.
Linük nung mezüngbuba basketball training agütsüba telok, NBA Academy India aser alima rangben nung NBA indang training centre pungububa atema senotsü ajak NBA-i agütsütsü aser iba centre ya April 2017 nungi lapoktsü.