NBA aser NSLSA-i Mkg nung legal awareness sentong ka katsü

Nagaland Bar Association aser Nagaland State Legal Services Authority nung ketdangsürtemi Mokokchung nung legal awareness sentong ka takok ngua katsür külen telok külemi tangokba noksa nung angur. Mokokchung, March 13, 2019.

Mokokchung, March 13 (TYO): Nagaland Bar Association (NBA) den külem sür Nagaland State Legal Services Authority (NSLSA)-i March 13 nü Mokokchung town hall nung “Legal Awareness Campaign” ta sür tzüzüng ozüng meteta alitsüyim dak sentakba nung sentong ka ayonga katsüogo.
Tanü iba sentong nung shisalen sayur Senior Adv. C.T. Jamir, Adv. Joshua Sheqi aser Adv. Rainbow Ngullie par asemi “G.Bs, D.Bs aser Village Council teinyaktsü”, “Rule of Law” aser “Welfare Schemes & Legal Support Systems” item onük nung ajemdaker temzüng ozüng dak sentakba nung shisa tarok aika bener arua tesentepertem den lemsatep. Iba sentong nung GB, DB den Mokokchung town kübok ward balala nungi ward lenirtem aika arua shilem agia aden.
Nagaland nung legal awareness kangabo maliba ajanga temzüng ozüng aser pei temetenji senso ajaki meteta alitsü tim ta angateta aser Nagaland Bar Association (NBA) tenzüker taküm küm tenem ajungba nüngtem nung district shia nung ‘legal awareness’ sentong balala katsüyonga jajar, ta tanü sentong nung mendenbuba aser NBA Golden Jubilee Committee convener, Akito Zhimomi-i metetdaktsü.
Kasa sentong nung Principal District & Session Judge aser Mokokchung District Legal Services Authority nung mendenbuba, Hukato Swu aser district administration tenüng nung SDO (C) Mokokchung, Thungchabemo tenadia mapang tatsütsü agia tepela o den tayongzükba o tulu bener arua lemsatep.