NBCA nung Pastor tanubosang ‘ordain’ asü

Dimapur, March 12 (TYO) : Nagamese Baptist Church Association (NBCA)-i Deobarnü Flames of Fire Baptist Church, Kohima Pastor, Rukuolhoulie Solo nem Ministerial License agütsüogo.
Sentong nung Executive Secretary, NBCA Rev. R. Meren-i Commission mapa inyakba sülen “Catch the vision” onük nung ajemdaker o jembidang, nisungtemi alizüng meyura parnok samatsü ta ashi.
“Tanü mezüng atema ni iba arogo semdanger aser Pastor Rukuo dak alizüng aliba ajitet nung iba arogo renloktsü ta amanger” ta paisa ashi.
Pastor Rukuolhoulie Solo-ia pa indang taküm kuli lemsatepdang, 2005 küm pa class 9 nung azüngdang Yisu Khrista nem taküm bendanga agütsü aser Pa sülen anidaktsü aser pa atema mapa inyaktsü mulungtet, ta ashi.
Pa küm 17 asüdang, pai kiboksema Yisu Khrista indang osang belenshi aser pa arishi küm 20 majungdang Yisu dang nisung meyirjang aika anir arutsü atema alizüng ayu. 2009 küm pai Flames of Fire Baptist church tentet aser iba mapang züngsem 9 dang liasü saka tangbo züngsem 450 aser Sunday school tanur 200 lir, ta Pastor Rukuo-isa metetdaktsü.
Paisa, March 24, 2017 nü Garo Baptist Church Kohima nung aser ano March 30 nü Tseminyu Town nung Asentenshi sentongtem alitsü osang metetdaktsü.
Iba sentong nung mendenji Women Secy NBCA, Mrs. Mhabeni Ngullie liasü, Garo Baptist Church Pastor, Daniel Sangma-i temoatsü meshia sarasadem aser Salie Nuh-i licence agütsüba mapang ketdangsüa agi.
Sentong nungsa Medosecho Yongo-i Lai azüng, Rev. Niveilie Mere-ia o tatsüka jembi aser Hosanna Prayer Group o Youth worship centre nati ken ajanga shilem agi.