NBCC aser ABAM-i state govt dang mepelar

Dimapur, Jan. 31 (TYO) : Nagaland Baptist Church Council (NBCC) ajanga January 30 nü state government aser Joint Co-Ordination Committee (JCC) ajurutepdakja Urban Local Bodies election magii atatsü nangzüktepba ken o to ajak asoshi osang tajung ka liasü, ajisüaka state government telemtetba aser State Election Commission tetuyuba ajanga January 30 nü NBCC lia Nagaland government aser JCC na nangzüktepba ken o mapa küma meinyaktetba atema kanga jashir ta NBCC nung tongti zülur, Rev.Dr.Zelhou Keyhoi metetdaktsüogo.
Iba ama tensa tia tamajung liaka, Naga nunger asoshi mapang tajung ka arutsü imlar ta paisa metetdaktsü.
Ao Baptist Arogo Mungdang (ABAM)-ia sangdong ka nung, yashi NBCC teyari ajanga Nagaland government aser JCC na tsüngda ULB election magi atatsü renemba telemtetbaji tajung ka liasü, saka ibaji state sorkar-i shitak mapa küma meinyaktetba asoshi kanga mepelar ta metetdaktsüogo.
Nagaland state sorkar-i nübortem rongnung telemsa adokdakja parnoki junger ta bilemba tesemtem nung election agitsü tekong meranga apusoba mapaji kanga shisabulua bilemtsür ta parnokisa metetdaktsü.
Nagaland sorkar-i nübortemi aginüba angaa state nung yimjung aser tesünep alitsü asoshi inyaktsüla ta ABAM nung Executive Secretary-i metetdaktsü.