NBCC-CEC aser NJCF longjemer sentong ka ayonga agi

Dimapur, Rongchii/April 03 (TYO): Nagaland Baptist Church Council (NBCC) Clean Election Campaign (CEC) aser Nagaland Joint Christian Forum (NJCF) longjemer April 02, 2019 anogo NBCC Platinum Hall, Kohima nung 17buba Lok Sabha Election atema sarasadem aser shisadokten sentong ka candidate aser political party balala den agia liasü.
“Tanü nungi tenzüker anogo ishika dang lir agitsü aliba election ya tasak asütsü, aser ibaji jenjang atema kisüng masü saka asen taküm kümzüka alitsü aser alima dang asenok Khristan ka ta sayutettsü asoshi,” ta Rev. Dr. Mar Atsongchanger, Convener, CEC, NBCC ajanga ashi.
Ibai talisa India nung tang aliba Parliament züngsemtemi linük lenmang taileni anir, kong parnok sentongtem ajanga aser ayak, taküm aser tamang amokmerener, anungji iba election ya taküm kümzüka alitsü rara ka asütsü, ta pai ashi.
State nung political party temi ‘secularism’ atema nokdaktsü ta sangdongaka iba shisadokten sentong nung candidate mesüra party representative kata arua maden. Iba sentong nung Mon district kübok Chen Town nungi Lok Sabha menden atema tokteptsü alisang Independent candidate Dr. MM. Thromwa Konyak aser BJP nung representative ka arua dena liasü.
Khristanpur shilem 100 lir ta jembiba Nagaland ya India nung teraksa ochimashi mapa timtiba aliba state ka ta asütsü ya taaktsü mapa lir, ta Rev. Atsongchanger-i ashi.
“Asenok ajaki loktiliba tajungba melenshiner, aser iba temelenshi ji na aser ni nungi tenzüktsü, koba ochishia temerük, tenokdangba mali aser tepur junga election agiba ajanga ataloktsü,” ta pai ashi.
Paisa sentong nung adener ajakdang ka küma longjemer tangatetba ka nung clean election atema tezüngzüktep yanglur ochimashi mapa nungi jenbua asen linük nung temelenshi aginüba ama temelenshi tenzüker kaka asütsü ayongzük.
“Asenok Khristan ka ama alitsü meranger aser asen müketa atalokbatem asoshi kanga shisabulua süoki ia bilemer, saka asenoki Khristan ka teinyaktsü mapa inyaker asü? Tanü asen dangi tenokdangtsü aruba tebilemtsütem asoshi asenoki shidakba sarasademer asü?” ta NJCF tir Rev. Dr. Zelhou Keyho-i lokti dang asüngdanga liasü.
Politics ya tajung saka asen linüki politics tamajung aitogo aser nüburtemi inyakyim tasen angashir, aser asenoki mapa tajung tiala inyakba ajanga temelenshi mangur, ta Keyho-i ashi.
Tensa mazüoktettsü amai kümaka Naga nungertemi tezü danga metoktsütsüla, ta pai ashi.
“Asenoki temelenshi aginüba ama asenoki Tsüngrem tsübua melenshitsü nüngdaker,” ta Keyho-i ashi.
Asen limai taneptsü arutsü mechi arogotemi temerük election atema raraba nung candidate tem aser state nung nüburtemi tashi angateptsü tim, ta Nagaland Joint Christian Forum tenüng nung Rev. Sanchu-ia ayongzük.
Paisa candidate aser political party tem dang vote agütsür nem temesepba yi magütsütsü mesüra vote malitsü ajungshi.
Kasa sentong nung Independent candidate Konyak-ia pa election-i aiba nükjidong lokti den lemsatepa liasü. Iba sentong nung adenertemi 17buba Lok Sabha election atema candidate, political party tem aser state nung nüburtem asoshi sarasademja liasü.