NBCC CEC Core Committee-i mepishir

Dimapur, July 27 (TYO): July 29, 2017 nü 10 Northern Angami – 1 A/C By-Election agitsü lia, Nagaland Baptist Church Council (NBCC) Clean Election Campaign Core Committee-i vote agütsürtem candidate tem aser Political Party/Party züngsemtem ajak dang election timi agitsü atema tensa meraksatsü mepishia metetdaktsüogo.
Ajaki Clean Election Guidelines sülen anidaktsü aser June 22, 2017 nü NBCC aser Political Parties tsüngda onük 18 bangzünga renemba ama inyaktsü mepishir, ta NBCC CEC Core Committee-i sangdong ka nung metetdaktsü.
Asen loktiliba nung terenlok aser temelenshi bener arutsü atema Tsüngremi temeten agütsüba vote ji oshishia agütsütsü ayongzüker. Nagaland nungbo asenok ajak Khristantem lir aser senyong vote ayokba aser polling station makdokba inyakyimji temenen dang masü saka Tsüngremi künobo iba atema obendangtsü. Anungji, Khristan tajung ka ka ama, Khristan tangatetba nung vote agütsürtemi shilem agitsü ayongzüker, ta NBCC CEC Core Committee-isa metetdaktsü.