NBCC clean election campaign sangdongba atema lanur ka reshikangshi

Dimapur, December 22 (TYO) : Phek yimtsüng nung Khochiyi ta ser lanur kati yimtsüng nung Nagaland Baptist Church Council (NBCC) indang Clean Election Campaign (CEC) tetuyubatem prokshiba atema Phek Village Youth Organization (PVYO)-i pa dak azük aser kanga mejungi merenshi.
2003 küm nungi tanü tashi Phek Village-i candidate ka dang pusema nungittsü tetuyuba agüja arur aser iba tetuyuba anema nokdakertem yimteni amokmeren aser parnok kar dak teka sangshi aser karbo reshikangshiba tatalokbatem liasü, ta Khochiyi-i ashi.
Pai iba ama yimya tamajung ya magizüker aser NBCC Clean Election teinyaktsütemji junger ta agizüka, pai par kiyong nung alirtem dang parnok tebilembatem asüngdang aser Clean Election aginürtem indang signature tem benden, ta Khochiyi-isa metetdaktsü.
Khochiyi-i mapa tajung inyakba osang angashiba sülen PVYO-i pa dang signature tem indang list parnok nem agüjang ta ashi saka pai signature temji yimtsüng nung lennir kar nem agütsüadoker liasü, ta Khochiyi’er kinungertemi ashi.
December 19, 2016 nikongtsütsü 4:30 ako nungi 5:00 ako tsüngda PVYO-i pa parnok indang office-i aja aser idakji pa tenük nembangtsüba sülen kanga mejungi azük, ta kinungertemisa metetdaktsü.
Parnoki pa dang iba osang shinga danga mashitsü amokmeren saka pai idangji “ni kodaser kü temang nung zübotem miimbangtettsü. Ni ozü kinungertem o temeimertem dang ashitsü” ta langzü.
Ano, tanga tatalokba ka nung, December 20 nü Council senden ka nung Phek Village Council Chairman-i Village Council Member Vekhupa Soho mapa nungi anentsüba osang metetdaktsü.
Vekhupa ya Phek Village Education Committee (VEC) nunga Chairman inyaker.
NBCC Clean Election teinyaktsütem prokshiba mapa pusema nungitba atema Vekhupa Soho VCM nungi anendaktsü, ta osang angazüker.
Pa mapa nungi anentsütsü asoshi kuli kecha mali, kechiyong pai aibelena inyakba kecha mali, ta Vekhupa-i ashi.
Lennir ka ama pai mapa tajung atema inyakba mission pusema nungittsü asoshi temeten lir aser ozüng dak sendakba mapa inyaktsübaji District Administration dak alaka tangar shingai meinyaktettsü, ta paisa shisem.