NBCC-i “Clean Election Campaign” indang shisatokden agi

May 3, 2017 nü NBCC Platinum Hall nung Clean Election Campaign indang state seminar agidang NBCC General Secretary Rev Dr Zelhou Keyho den tangartem agiba noksa angur. 

Kohima, May 3 (TYO): Sangküm küm tetenzüklen Nagaland state nung general election agitsü lia, Nagaland Baptist Church Council (NBCC)-i Bodbarnü Clean Election indang State Level Seminar ka ayonga agiogo.
“Clean election movement ya NBCC-i tenzükba lir aser iba maparen ya political party kar ajanga tenzükba masü mesüra yimten onük tebilemba kecha mali,” ta tanü NBCC general secretary, Rev Dr Zelhou Keyho-i okila jembidang ashi.
“Clean Election maparen ya yimtenren telok shinga anema mesüra atema masü. Iba maparen ya yimten lennirtem anema masü mesüra lennir kar ajungkettsü mesüra laodaktsütsü atema masü, saka kechi shitak ibaji inyaktsü atema lir” ta paisa metetdaktsü.
“NBCC-i Election mesüra yimten lennirtem anema nokdakerba masü, saka inyakyim mejungi kümer aliba anema nokdaker. Election dak sendakba maparen ajanga asen state raksatsüba anema onoki tebilemtsü abener” ta Rev Dr Zelhou-isa shisem.
Iba inyakyim merüktettsübaji nisung ajak indang tebilemtsü aser teinyaktsü lir. Election dak sendakba inyakyim kanga mejungi kümogo aser iba ya ajanga Naga nungertem alenbangogo aser temenen mapa nung nisungtem alangogo, ta paisa metetdaktsü.
“Clean Election maparen ajanga nübortem dang election nung ochimashi anema ola adoktsü tayongzükba agütsür. Iba maparen ajanga public-i pei mulungsentsü agi angateta, sen yong mesüra tanga teyari kecha magii, pei nem temeten agütsüba amshitsü aser shitak o tai bendangtettsü indang tesayuba agütsür” ta NBCC General Secretary-isa ashi.
“Yimtenren mapa mesüra yimtenren teloktemi asenok tamangba yimsü dak kongshitsüsa mapa inyakdang Arogoi teti iba anema nokdaktsüla” ta paisa shisem.
Sentong nung ABAM Executive Secretary, Rev. Dr. Mar Atsongchanger-i o jembidang “Election nung ochimashi inyakyimtem ajanga Naga loktiliba asoshi tayongzükba bener arutsüba ajanga Clean Election ya tenzük. Lennir tajungtem adokba ajanga Naga nunger kechisarena ajak nung merüktettsü. Naga nunger loktiliba ya kinük ajungalen nungi kümzüka ayutsüla, anungji asenoki Clean Election ya telung tonga ia angateta inyaktsüla” ta ashi.
Angami Baptist Church Council Executive Director, Rev. Dr. Atsi Dolie-ia “Naga nungeri lennirtem shimtsü atema teti election maparen inyaktsü aser iba asoshi clean election campaign ya State Assembly elections atema dang masü saka Village Councils, Students’ Unions, Municipal aser Town Council elections dena sendakteptsüla” ta ashi.
“Election ajanga arogo züngsemtem tsüngda-a tsükchitep adokdaktsür, anungji tangatetba tamajungtem ajanga Arogo manishidaktsütsüla” ta Rev Atsi Dolie-isa shisem.
Sentong nung Deputy Director ATI, Dr. Hovithal Sothu-i “Clean Election Guidelines” indang onük jembi aser Symbios Creations (P) Ltd Managing Director, L. Monkhum Jamir-i “The role of civil society” onük jembi.