NBCC-i college tem asoshi Clean Election Campaign tenzüker

Kohima, July 22 (TYO): Nagaland Baptist Church Council (NBCC)-i college azüngertem dang clean election osang sangdongtsü atema tanü state ajunga nung inyaktsü sentong ka tenzükogo.
NBCC Youth Department-i election mapang temenen mapatem inyakba anema sentongji Hombarnü Kohima Science College (Autonomous), Jotsoma nung tenzük.
Iba sentong nung NBCC general secretary, Rev Dr Zelhou Keyho-i ashiba agi, clean election campaign ajanga tai aser shitak metetdaktsütsü aser iba sentong ajanga Naga nunger yimyatsüya  aser tangatetba telungtiba nung melenshidaktsütsü atema agir.
“Clean election campaign yagi temenen mapa agientsü aser asen sobaliba aser inyaksangshi nung khenyongi meinyakdangi aruba tamajung inyakyim agientsü atema lir. Election nung temenen mapa inyakba ya asen loktiliba nung tera kanga junga yanga lir aser Naga nunger lokti nung maneni iba inyakyim benshir,” ta Rev Dr Zelhou-i ashi.
“Tanü asen state nung election agiyim ajanga asen senso temeten aser maongkatem samatsüogo aser tarutsü tia raksatsüogo. Iba inyakyim ajanga nübortem ola madok kümdaktsüogo. Arogoi lanurtem den iba khuret lemsatepbaji, nenok aitsütsü atema masü saka nenok dak teimla anguba ajanga lir,” ta paisa ashi.
“Nenok ya tarutsü putu lir. Tarutsü tia tajungba yanglutsü atema tanü temelenshi bener arutsü atema nenok dak tashi lir. Tesüiba aser tang aliba putui nenok atema iba khuret bener arutsü” ta Rev Zelhou-i ashi.
“Asenoki shitak inyaktsüla. Asenoki election nung ochimashi anema ola adoktsüla. Joko ojang dang ta asenoki ashitsüla aser iba inyakyim agientsü atema mapa inyaktsüla. Asenok Naga nungertemi iba election system memelenshira, asenok tamashirtem ama samatsü. Asen tarutsü tia yanglutsü atema asenoki mapa inyaktsü atema iba sentong agir. Lanurtemi asen temeten metettsüla aser vote ka indang tashi aser ibaji ajanga loktiliba nung temelenshi bener aruba metettsü merangtsüla” ta paisa ayongzük.
“Asenoki kodang asen senso temeten yoka chidir, asenoki ano maneni yoka chinütsü aser iba jagi asenok tejashiba akümtsü. Asenok temeten alirtemi asenok ajembangtsü. Kodang asenoki asen senso temeten yoka chidir asenok tangar nem ashiokdaktsür aser parnok nem asenok amshidaktsür. Ashioktsüba aser yoka achiba inyakyim anentsüla. Anungji asenoki election mapang aser senso temeten yoka machitsü atema telemtetba agidi. Iba inyakyim ajanga loktiliba raksatsür. Asenok temelenshi bener arurtem südi” ta Rev Dr Zelhou-isa ayongzük.
“Asenoki shinga daka tai metongloktsüli saka tarutsü tia yanglutsü atema inyakyim melenshidi” ta paisa shisem.
Tanü agiba sentong nung NBCC Women Secretary, Visasieu Dolie-i Pledge Card sign asüba ketdangsüa agi aser Assistant CEO Nagaland, Awa Loring ajanga Election Department-i clean electoral roll maparen inyakba osang metetdaktsü.
Sentong nung mendenji Kohima Science College Principal liasü, NBCC Youth Secretary, Vikuo Rhi-i tesentepertem pela agizük, NBCC Finance Secretary, Rev. Yamyap Konyak-i sarasadema tenzük aser Education Secretary, Dr Botoholi-i sarasadema tembang.
Sentong nungsa Nagaland nung Clean Election indang video ka sayu aser tesentepertem ajaki “We shall overcome someday” ken aten.
NBCC Youth Department-i clean election campaign ya Nagaland kübok aliba college tem nung agiyonga aotsü sentong lir.