NBCC-i sentep magii atatsü nenshir

Dimapur, April 1 (TYO): Nagaland Baptist Church Council (NBCC)-i linük ajunga shibangba mapang metembang tashi tenla kidang mesenteptsü atema metetdaktsüogo.
“Asenok kümzüktsü atema Tsüngrem dang taochi aser teyari meshir saka kasa mapang nung iba ama tensa ka nung asenok ajaki kümdanga alitsü tim” ta NBCC General Secretary, Reverend Dr. Zelhou Keyho-i ashi.
“Ketdangsertemi tuyuba sülen asenoki tashi angaa anidaktsüla aser nisung o nisung tsüngda tepila ayutsüla. Tang ya asenok kati ka dak tai tongloktsütep mapang masü saka külemi longjemer iba alima wara anema raratsüla” ta Rev. Keyho-isa ayongzük.
Paisa tamanger ajak dang sorkar ketdangsertem, health workers, media persons aser bank nung inyakertem asoshi maneni sarasademtsütsü ayongzükogo.