NBCC-i ‘special drive’ nung shilem agitsü mepir

Dimapur, June 28 (TYO): July 1 nungi 31, 2017 tashi Election Commission of India (ECI)-i State aser Union Territory ajak nung “special drive” inyaktsü aliba maparen nung Nagaland nung aliba senso ajaki shilem agitsü ayongzüker, ta Bodbarnü Nagaland Baptist Church Council (NBCC)-i metetdaktsü.
Asenok külemi inyakba Clean Election Campaign tashi itshitsü atema senso ajaki iba special drive nung shilem agitsü mepishir. Iba maparen ya arishi küm 18 nung 19 tsüngda aliba voter tasentem tenüng züluoktsü aser tang aliba e-roll merüktettsü atema lir, ta NBCC-i sangdong ka nung ashi.
Nagaland nung Chief Electoral Officer lenisüba kübok iba mapa inyaktsü aser iba mapang ya Nagaland nung e-roll merüktettsü maongka ka lir ta agizüka ajaki shilem agitsüla, ta parnokisa ashi.
Nagaland nung bogus e-roll aliba asenoki meteta lir aser iba ya Khristantem teimba sür aliba state ka atema maaksü lir. Taila vote aliba ajanga proxy voting, vote alizükba aser candidate temi taila vote tem alizüktsü atema toktepba inyakyimtem adoker, ta NBCC-isa shisem.
ECI-i Special Drive inyaktsü aliba nung NBCC-i Chief Electoral Officer, Electoral Registration Officers, District Election Officers aser Booth Level Officers (BLOs) dang iba mapa timi aser kanga dang nendaka inyaktsü mepishir.
Maneni, BLOs-i lokti lennirtem teyari agia nenok telongtet nung nisung ajak tonga oa inyaktsü mepishir. Iba denji külemi, kija, kibong aser yimtsüng/kiyong, reju, NGOs, arogo lennirtemi Election Department den yaritepa e-roll merüktettsü ayongzüker, ta NBCC sangdong nung ashi.
Kaketshir, tetsür, hoho, arogo, shisaliok rejutem, civil society lennirtemi arishi küm 18-19 tsüngda alirtem dang e-roll nung tenüng züluoktsü atema shisatsü agüja ajungmesotsü ayongzüker, ta parnokisa shisem.
Nisung ajaki Special Drive nung pei tangatetba tajung agi shilem agitsü mepishir aser Nagaland nung tamangertem ajaki state election ketdangsertem aser lokti lennirtemi tetsükdaktsü kecha majurui iba mapa timi inyaktettsü atema sarasademtsütsü ayongzüker, ta NBCC-isa metetdaktsü.