NBCC-i Sri Lanka nung kiralongba mapa aitsür

Dimapur, April 22 (TYO): Easter Deobarnü Sri Lanka nung tekülemertem aser tai makertem tepsetba atema kanga jashir ta Nagaland Baptist Church Council (NBCC)-i metetdaktsü.
Meimchirtemi tanga tamangba yimsütem aser tai maketertem dak yamai sempaa mapa tamajung inyakba ya mangateter. Asenok tamangba yimsü balala asütsü akok saka asen tamangba yimsü ajanga meimteptsü aser loktiliba nung putepa alitsü sayur, ta NBCC General Secretary Rev. Dr. Zelhou Keyho-i ashi.
Asenok tamangba yimsü balala asüba yong ta ser kati ka sempatepa tepsettsü merangra, asenok kodaser külemi liyonga otettsü? Alima nung tesempatep tajemba aser temeim teimba nüngdaker. Asenok kati ka akhümtsübuteptsüla aser alima tajungba kümdaktsütsü merangtsüla, ta paisa shisem.
Sri Lanka nung Easter Amungnü atalokba lendongji taoksatsüka lir aser iba atema alima ajunga jashidaktsüogo aser mang ayimer. Shibai metet Tsüngrem-a jashidaktsür alitsü südi. Asenoki tesempatep meyipa magütsütsü saka yimjung aser tesünep angutsü atema Tsüngrem bushidi, ta Rev. Dr. Zelhou-isa metetdaktsü.
Nagaland nung aliba Khristantem ajaki tasür kibongtem, yirua alirtem aser timtem ajurua alirtem atema maneni sarasademtsüdi, ta paisa ayongzük.