NBCC-i state asoshi sarasademtsü mepishir

Dimapur, February 09 (TYO) : Tang Nagaland lendong aketba tensa tamajung ka agi menepa lir. Iba animesüngzüktetba tensa agi kongshia aliba yimten aser lokti naprong asoshi tebilemtsü ulura kümogo, anungji State asoshi asen temokok agi ali nung tsükiter sarasademtsü mapangji tang ya lir, ta Brihostibarnü Nagaland Baptist Church Council (NBCC)-i sangdong ka ajanga ashi.
Asenok jakdang aseni shisatsü aser tashi agi mekoktetba tensa agi menepdang asenoki sarasademer, ta sangdong nungji shia lir.
Anungji Yisu dak amanger aser Arogo ajaki asen state nung tanaben yimjung aser tesünep arudangjang ta sarasademtsü NBCC-i mepishir.
Sangdong nungsa, tang ama tensa ka nung asen lenirtemi tarutsü putu asoshi telemtetba shitak agitettsü atema asenoki parnok nem shisatsü meshizükja sarasademtsütsüla, ta shia lir.
Telemtetba shitak agitettsü asoshi parnok shisatsü aser tenarong lapokjang aser yimtenren melenshiba aser aremzükba tsütsü ochishia inyakba den asen taküm, sobaliba aser sorkar ajaki ozüng kübok ochi litettsü sarasademdi, ta sangdong nungsa shia lir.