NBCC-i tenüngsang agütsür

Kohima, November 24 (TYO): Clean Election Campaign (CEC) Core Committee Convenor, Rev. Dr. Mar Atsongchanger-i Clean Election mapatong ya ajak indang lir, aser küm aika jakdang tenzükba NBCC Clean Election Campaign mapatong nung village council-tem aser osangbenertemi asen lima election agiba inyakyim merüktettsü atema tasüitta yimjak nung nungita sangdongba atema tenüngsang agütsür, ta tanü Nagaland Baptist Church Council (NBCC)-i sangdong ka ajanga metetdaktsü.

“Langpangkong Range, Mokokchung-i pangzüng tesashi renemba, Diezephe Village, Dimapur-i Electoral Rolls merüktetba aser Nagaland nung osangbenertemi yimtenren party candidate ka pusemba sangdong osangkakettem nung madoktsütsü ta lemtetbaji tenüngsang agütsütsü tetemsü,” ta NBCC-isa metetdaktsü.

“Item mapa tajung ajanga tanüngba yimtsüngtem aser lokti tentettem ajungmesoba dang masü saka nisung ajak ajungmesotsü, koba ajanga asen state nung election agiyim tajungba akümtsü aser CEC mapatong takok angutsü Committee-i imlar. Anungji stakeholders, lokti tentettem aser nisung ajaki iba mapatong nungidaktsür,” ta NBCC-isa mepishia metetdaktsü.