NBCC-i ULB election thinenba osang jangjatsür

Kohima, January 30 (TYO) : Nagaland Baptist Church Council (NBCC)-i sangdong ka nung State sorkar aser Joint Coordination Committee (JCC) tsüngda telemtetba agiba osang jangjatsüogo.
NBCC general secretary, Rev. Z Keyho-i ashiba agi, “Tsüngremi ashiba anga, NBCC-i Chief Minister T R Zeliang-i anir Nagaland sorkar aser convener Subu Jamir-i anir JCC tsüngda senden ka amentsü ayongzük.”
Senden nung sorkari ULB election magii atatsü mulunga agizük aser iba nung ajemdaker JCC-ia mokdangba sentong anentsü mulungtet, ta Rev Keyho-isa sangdong nung ashi.
Tamangertemi Tsüngrem dang nungi yimjung aser shisatsü meshia sarasademtsüba atema NBCC-i pelaba metetdaktsür, ta sangdong nungsa metetdaktsüogo.
Ano külen, Kohima nung Angami Public Organization (APO) aser Chakhesang Public Organization (CPO) pur APO Conference Hall nung senden ka amen.
State sorkar aser Tribal teloktem tsüngda tekong merangtepba nung lendong keta lir ta angateta APO aser CPO tsüngda senden amen.
Nagaland nung kin kechaia ULB elections magidaktsütsü ta mashi saka Nagaland Municipal Act ya mapa küma meinyakdang tamasa iba Act jungjunga shisadanga reprangtsü atema mapang ang meshisem, ta tanü APO aser CPO senden nung jembi.