NBCC-i uniform civil code magizüker

Dimapur, November 19 (TYO) : Putu 21 buba India yimtenren nung kanga dang ashishitep aketba onük rongnung uniform civil code onük ya ka lir, ta Nagaland Baptist Church Council (NBCC)-i Law Commission of India dangi züluba shidi ka nung metetdaktsü.
Parnok sorkar akümtsü tashi ngura, uniform civil code yanglutsü ta nangzükba yimten telok mezüngbubaji BJP liasü. Ajisüaka, iba tenangzükba ya mapa küma inyaktsü tezüpa masü, kechiyong iba onük ajanga India linük tamendakdak nung kongshir. British nungeri India madak yimsüsüba mapang nunga sorkari iba onük nung tebang mai, kechiyong iba nung lendong keta lir ta parnoki angateta liasü, ta NBCC-isa ashi.
1947 küm India nüjiso anguba sülena, yimten teloktemi tensa meraksatsü aser telok balala tsüngda putepa alitsü tangatetba nung uniform civil code yanglutsüba indang onük mejembii dang aru. Ajisüaka, Centre nung tang aliba sorkari election nüboyimba mapang nangzükba ama uniform civil code ka yanglutsü asoshi maparen tenzükogo. Iba nung ajemdaker parnoki Law Commission of India-i yangluba questionnaire tem civil society tem, tamangba yimsü dak sendakba teloktem aser kijatem dangi yokogo.
Khristantem, talisa Nagaland Baptist Church Council (NBCC)-i Law Commission indang questionnaire tem melangzüteter kechiyong Lai o nung ajemdaker aliba onok tamangba aser tesayubatem iba nung enoksema mali.
Uniform civil code yanglura, iba ozüng ajanga India linük nung sobaliba ka mesüra tamangba yimsü kati amokbangtsüsa akümtsü. Uniform civil code ka yanglutsü atema inyakba maparen nung tamangba yimsü ka dak sendakba onüktembo enoksema mali, ta parnokisa metetdaktsü.
Uniform civil code ka yangluba ajanga linük nung nübo agi tangar memenepertem nem tetsübo aser timtem tulu bener arutsüdang nungibo, India-i teti noktakba ama nübo agi tangar memenepertem sadoka litettsü atema ang mapa tuluba inyaktsüla. Hinduism, Muslim, Christianity aser Parsism mesüra tanga tamangba yimsü ajak pei tangatetba aser inyakyim kübok yimchi yimjung nung lidakjang. Chichiba tamangba yimsü ajanga tangar nem lendong bener marutsütsü aser tangar majembangtsü, NBCC-isa ashi.
Anungji, onokibo lokti, sobaliba aser tamangba yimsü ka küma yangluba uniform civil code magizüker ta Nagaland Baptist Church Council (NBCC)–i Law Commission of India dang metetdaktsü.