NBCC tenüng amajok nung tetshibaji aitsütsüla: CMO

Kohima, February 12 (TYO): Osangkakettem nung, Chief Minister-i NBCC nungi teshimtet telok dang, “NTAC aser JCC dang, financial year tembang tashi, March ita tashi pa tashi nung alitsü atema shijang ta ashi,” ta adoka lir; nisung ka tenüng agi Nyekha-i ashibaji khenyongi tai aser Chief minister menden akhümket raksatsütsü nükjidong nung tai puraba lir, ta tanü Media Cell, Chief Minister’s Office, Nagaland-i sangdong ka ajanga metetdaktsü.
“Iba ama tai tongloktsütsüsa JCC lenir kati pa jenjang iba tashi sensamasaa inyakba, aser talisa pai jangraba ataloktsü atema NBCC akhümket tenüng tetshibaji aitsütsü tetemsü. Chief Minister-i NBCC ji akhümketa züngshir, aser tang tensa atema telemtetba tajung kati arutsü atema parnoki (NBCC) meranga inyakbaji kanga pelaa züngshir,” ta Media Cell, CMO ajangasa metetdaktsü.
“Aser pai ajak dang NBCC tenüng tajungji amajok nung mamshitsü atema ayongzüker. Tesüiba hopta ana nung Chief Minister-i NBCC den senden aiben menogo, ajisüaka iba mapang nung pai iba asoshiji memepishi, mesüra pa elungjang nunga mebilem. Chief Minister-i khuret abener lenirtemi sangdong kümdanga agütsüdaktsüner,” ta sangdong nungsa shia lir.