NBCC Women dept-i asen lima atema sarasademtsü ayonger

Dimapur, Feb. 16 (TYO): Nagaland Baptist Church Council (NBCC), Women Department-i Church Associations, jilatem aser yimtsüngtem nung Women Fellowships, rejutem, local Arogotem aser Women Prayer groups nung tetsür Secretary tem dang February 18 mesüra 19, 2017 anogo nung sarasadem sentong ka ayongtsü mepishia metetdaktsür, ta NBCC, Women Department Secretary, Visasieü Dolie-i tanü sangdong ka ajanga metetdaktsü.
“Telok balala, kiyong balala aser local Arogotem nung lenirtemi tongtibang junctions, lenmang mesüra public tesemtem nung ayonga iba sentong kadaktsüner. Sarasadem sentongji peipei tesem mesüra kiyong balala apir pei sasep nung tensa apir mapang agiteta iba sentong agitsü junger, ta parnokisa metetdaktsü.
“Iba dak alia sarasadem mapangji anepdang tang mokdang volunteer tem lia agitsü ajungshir,” ta NBCC Women Dept.-isa metetdaktsü.
Sarasadem nung bilemtettsü atema tongtibang onük kar:
1. Tatidang tagidakpurtem tatidang junga agütsütettsü atema sarasademjang.
2. Asen lima nung Tsüngremer ochiba aser sentong jungkai adoktsü atema sarasademjang.
3. Asen lenirtemi telemtetba shitak agitettsü atema Tsüngremer tanelai parnok len anitsü atema sarasademtsütsü.
4. Nüburtem aser mokdang volunteers aser ozüng amert sepaitemi timtesüi inyaktsü atema sarasademtsütsü.
5. Joko asen lima nung azütokshi malitsü mesüra asü-amaba malitsü atema sarasademtsütsü.
6. Tang mepetmesü tensa adoka aliba ya tekaraba nung yimjung ajanga tajungtiba latettsü atema sarasademtsütsü mepishir, ta parnokisa metetdaktsüogo.