NBSE aser NSE-i Class-IX atema Financial Literacy Course tenzük

May 10, 2016 nü Kohima nung Commissioner & Secretary F P Solo, NSE MD & CEO Chitra aser NBSE Chairman Asano Sekhose nungeri Financial Literacy Course kaket sayaba mapang agiba noksa angur.

Kohima, May 10 (TYO) : National Stock Exchange of India Limited (NSE) aser Nagaland Board of Secondary Education (NBSE) nati tanü Nagaland nung Financial Literacy Course tenzükogo.
North East Region nungi Class IX kaketshirtem atema NSE ajanga Financial Literacy course agiba mezüngbuba state ji Nagaland lir.
Tanü School Education & SCERT, Nagaland Commissioner & Secretary, F P Solo-i iba course tenzüktsüdang, kaketshirtemi senotsü amshiba dak sendakba inyakyim angazüktsü aser ibaji ajanga linük rongsenren jenjang renloktsü imlar, ta ashi.
Financial Literacy Course agiba ajanga lanuputui senotsü lalushibonga amshiba inyakyim anentsü aser commerce o financial management azüngtsü jangratsü, ta Solo-isa ashi.
Sentong nung NSE Managing Director aser CEO, Chitra Ramkhrisna-ia o jembidang, “iba course tenzükba ya NSE aser NBSE atema kanga dang tongtipang mapa ka lir aser senotsü ketdangsüba indang yimya metsü proker asütsü” ta ashi.
“Kanga dang kara ainba sector tem rongnung financial sector ya ka lir aser iba ajanga kaketshir nem mapa angutsü maongka agütsütsü, anungji lanurtemi senotsü dak sendakba maparen kanga junga angazüktsüla” ta Chitra Ramkhrisna-isa shisem.
Financial Literacy course ya kaketshirtemi ghonda 25 nung tembangtsü. Iba curriculum nung income & expenditure, savings, banking system, financial planning, money management, financial goals onüktem sayutsü.
Iba course ya district asem- Kohima, Dimapur aser Mokokchung nung Class IX kaketshirtem atema mezüng tenzüker aser taruba academic session nungi tanüngba district 8 nunga tenzüktsü, ta NBSE chairman, Asano Sekhose-i metetdaktsü.
Sorkar school 4 densema school 60 nungi kaketshir 5153-i iba course agitsü atema tenüng züluokogo, ta laisa shisem.
Nagaland nung financial course ya shilem ana lemsar agi aser mezüng 2014 nung HSSLC atema ‘Financial Management Market Service’ liasü aser tang Class IX atema tenzüker, ta NBSE Chairman-isa metetdaktsü.
Tanü Financial Literacy Course tenzükba sentong nung mendenji Controller of Examinations, NBSE, Rangumbuing Nsarangbe liasü, St. Mary’s Cathedral HSS Kohima Principal, Fr. John PM-i temoatsü meshia sarasadem aser Vineyard School, Kohima kaketshirtemi ken ka aten.