NBSE Class-IX question paper auyaba ajanga anogo melenshir

Kohima, November 21 (TYO) : Taküm Class 9 question papers auyaba onük nung ajemdaker Nagaland Board of School Education (NBSE)-i Class-IX final tatidang agitsü anogo thinenogo.

Dimapur district kübok Mount Hermon School, Purana Bazar-i NBSE ket nungi tatidang indang question paper agizükba Hokolbarnü sama ta osang angazükba sülen Board-i iba telemtetba agi, ta NBSE Chairman, Asano Sekhose-i sangdong ka nung metetdaktsü.

Mezüngbo Class 9 final tatidangji November 24 nungi tenzüktsüba liasü saka NBSE-i ibaji November 28 nungi December 14 tashi agitsü mapang melenshiogo.

NBSE-isa Mount Hermon School, Purana Bazar, Dimapur nungi examination centre temelaba meyipa agiogo aser Class IX Final Examination atema centre tasenbaji Bethesda Higher Secondary School, Dimapur alitsü, ta NBSE Chairman-isa ashi.

Iba tatalokba ajanga tanga class tem indang tatidang nung temelenshi kecha mali aser ajungbena sodi anogo denjiyonga Class 9 routine tasenba nung temelenshi kecha malitsü, ta laisa metetdaktsü.

NBSE-i Class 9 final examination atema English, Mathematics, Science, Social Science, Environmental Education aser Alternative English atema question papers tasen agütsütsü. Question papers ji December 3 aser 4 nung district headquarters nung agütsütsü aser Kohima district atema Board office nungi angutsü, ta NBSE Chairman-isa ashi.

Class-IX final examination indang routine tasenba tapak 3 nung agüja lir.