NBSE-i ‘Cyber Safety’ indang anogo ka seminar agiogo

Kohima, February 02 (TYO): January 31, 2019 nü Baptist High, Kohima nung Nagaland Board of School Education (NBSE), Kohima-i ayongzükba Heads of Institutions pur Cyber Safety indang anogo ka seminar agiogo, ta tanü ketdangsertem osang ka ajanga metetdaktsü.
Iba seminar nung Cyber Security Expert Consultant – Internet & Mobile Association of India, Rakshit Tandon-i ketdangsertem dang digital technologies amshiba dak sendakba nung lanurtem nem tesayuba agutsütsüla, temzüng agutsütsüla; khuret lia tim agi technology amshitsü nüngdak, ta metetdaktsü.
“India nunger lanurtemi technology kanga amshir, anungji parnok dang ‘digital citizens’ ta jaa tenüngsang agutsütsü akok, ajisüaka parnok aikati tang aliba cyber ozüngtem memetet,” ta pai ashi.
Paisa, school aser tsüraburtemi technology dak sendakba nung timtem metetdaktsüba ajanga kaketshirtem timtem nungi kümzüktsü, ta ashi.
Paisa taküm anema alitsü atema lanurtem phone/screen nung mapang indoktsü atema mapang telatet yutsütsüla, ta ashi. “Tsüraburtemi ketdang mesüi tanurtem nem internet amshidaktsüra timtem jenti ajurutsü, aser ibaji tsürabur mashimalu ajanga asutsü. Cyber ajanga tenüng menüktsüba, cyber ajanga amokmerenba, data breach, social media nung ochimashitem, cyber ozüng alema amshirtemi noksa yanglusiba, hack asuba, ashioktsütepba aser games kanga asayaba ajanga temang nung timtem agutsübatem indang tsüraburtemi rajema alitsüji kanga nüngdak,” ta paisa metetdaktsü.