NBSE-i school tekolakpurtem den senden amen

Kohima, March 15, 2024 (TYO): Nagaland Board of School Education (NBSE)-i tawa tasen shimba head of institutions den senden ka menogo.

Nagaland Baptist Church Council (NBCC), Kohima indang Platinum Hall nung senden amendang district 16 nungi school 160 tekolakpurtem aden.

“NBSE-i küm shia head of institutions tasentem den senden mena arur. Talisa National Education Policy (NEP) 2020 tenzükba sülen iba senden ya kanga tongtipang kümogo” ta Secretary, NBSE Rangumbuing Nsarangbe-i ashi.

“School ka nung tekolakpurtemi tongtipang shilem agi aser pa/lai angazütsü jangratsüla aser school tajungba akümtsü merangtsüla. NEP 2020 nung aliba alizüngtem ama tajungba akümtsü asoshi inyaktsüla” ta NBSE chairperson Asano Sekhose-i ashi.

“Putu 2l buba nung shisaliok ya kaketshirtem teti atema tangazükertem kümdaktsütsü, angazüktsü jangratsü aser tanaben angazükshitsü nükjidong lir. School tekolakpurtemi competency based education angatettsüla aser kaketshirtemi kechi angazüktsüla iba nungji temulung agütsütsüla” ta lai ashi.

Iba senden nung shisalen sayurji Associate Professor, SCTE, Kohima Dr. Bendangla liasü.

Lai Role and Responsibilities of the Head of Institutions in the implementation of NEP 2020 onük jembi.

Senden tanabuba shilem nung Chief coordinator IT, NBSE-i IT dak sendakba osang lemsatep.

Pai WhatsApp group; district-wise, centre Superintendent, Financial Literacy Groups, NBSE portal, data collection software, social media (Facebook/Twitter) aser IT interventions indang osangtem metetdaktsü.

Maneni, Joint Secretary (Academic), NBSE Iluheing Nsarangbe-ia NEP 2020 nung ajemdaker teinyaktsütem lemsatep.