NC-i BJP den melokteptsü: Omar Abdullah

Jammu, February 07 (Agencies): Jammu and Kashmir nung PDP-BJP teloktep raksara National Conference (NC)-i BJP meyaritsü ta metetdakja tanü Deobarnü taoba mapang state chief minister aser NC tongti lenir, Omar Abdullah-i, Peoples Democratic Party (PDP) Tir, Mehbooba Mufti-i ola adoktsüla, kechiyong state sorkar akumtsü atema lai state ajak atasa-a melidaktsütettsü, ta ashi.
Jammu nung sentong ka tembangba sülen osangbenertem den jembidang Omar-i, “Mehbooba Mufti-i mapang talangka ola madoki liogo, joko lai ola madoki malitsüla. Onük ana asem nung lai la ajemdakdakji metetdaktsüla. CBMs ji kechi aser Confidence Building Measures atema lai mapang kobika atatsü aser Mufti Mohammed Sayeed (taoba state Chief minister) asüba sülen kechiba ajungbena CBMs nüngdaker, ta onük süoka jembir,” ta ashi.
NC tongti Omar-i, tang state sorkar meliaka PDP aser BJP teloktepbo tang tashi meraksai lir, ta ashi.
“Onoki angatetba agi, tang tashi nung tezüngzüktep dak sentakba nung teloktep (BJP aser PDP) maneni lir. BJP mesüra PDP naprong nungi teloktep raksaba osang onoki mangazük, anungji teloktepji meraksai lir aser teloktep lira, kechiba sorkar makümer(?),” ta Omar-i ashi.
“Teloktep atema onüktem lemtetba sülen Mufti sahab chief minister kümdaktsü. Tesüiba ita ter tsüngda kechi melenshi, tanü assembly nung menden peria liaka parnoki kechiba sorkar makümer(?),” ta paisa ashi.
Omar-i, parnoki sorkar akumtsü renema melira teloktepji raksatsüla ta NC-ibo mapang shia shijen ashir, ta metetdaktsü.
January 31 nü Mehbooba-i lar party core group senden nung, J&K sorkar akumtsü atema lai memelungi mali, ajisüaka tebu Mufti mangdang ataloktsü atema inyaktsü ta teloktep party, BJP-i menangzük tashibo sorkar makumtsü, ta metetdakja liasü.
Mehbooba-i, state nung terenlok aser yimjungji kübu, Mufti nükjidong liasü, aser iba atemaji teloktep party BJP menangzükra sorkar makumtsü, ta tamalen jembia lir.
January 7 nü New Delhi nung J&K CM Mufti ajungbena alima nungi pilaba sülen January 8 nungi J&K state ya Angh yimsüsüba kübok lir.