NC-i Rajnath ajurua injang tila amshiba anentsü mepishi

Srinagar, August 24 (Agencies): Bodhbarnü Opposition National Conference (NC) nungi teshimtet telok kati Union Home Minister, Rajnath Singh ajurua pa dang injang tila amshiba anentsü mepishiba den külemi Kashmir onük atema stakeholders den ken o jembitsüla, ta ashi.
Taoba Jammu & Kashmir chief minister, Omar Abdullah lenisüba nung NC nungi züngsem troki Singh den minute 45 shi senden amen, ta ketdangsertem osang ka ajanga metetdaktsü.
Parnoki Home Minister dang Kashmir nung lokti azüoktsü atema injang tila amshiba tangsa anentsüla ta shiogo, ta kasa osang ajangasa ashi.
“Parnokisa Centre dang ketdangsüa Jammu and Kashmir nung teti atema telemtetba tajung ka dangi arutsü atema stakeholders den ken o jembitsüla ta shiogo,” ta tanga osang ka ajanga ashi.
Tanü Rajnath-i pai Kashmir nung stakeholders balala den ken o jembitsü, ta shiogo.
Pa Kashmir-i apusotsü lia pai twitter ajanga, “Ni lokti tentettem, yimtenren party tem aser stakeholders den jembitsü,” ta metetdaktsü.
Hombarnüa Ato kilonser, Narendra Modi-i New Delhi nung Kashmir nung opposition party tem ajurua liasü, iba sülen tang Singh-i Kashmir semdangogo.
Taoba ita nunga Omar lenisüba nung Opposition party tem New Delhi-i oa Tir, Pranab Mukherjee, Ato kilonser, Narendra Modi aser Congress tatong Tir, Rahul Gandhi nunger ajurua Kashmir tensa indang metetdakja liasü.
July 8 nü south Kashmir, Anantnag district nung security sepaitemi Hizbul Mujahideen kiralongrar commander, Burhan Wani tepsetba sülen anogo ka lir July 9 nü nungi tenzüka Kashmir nung anogo aika longkak aitertemi sepai dak long agi ona raradang nisung 66 tashi asüba sülen tanüa Singh-i security tensa reprangdangtsü atema state semdanga liasü.
Bodhbarnüa south Kashmir, Pulwama district nung longkak aitertem aser sepaitem tsüngda raradang lanur ka süogo.
“Aamir Bashir dak teku nung injang tila agi yiruba zübo keter yangi aliba SMHS Hospital-i anir aru, saka doctor temi pa süogo ta sangdong,” ta police ketdangser kati ashi.