NCC Day nüngtem nung NCC-i Orphanage semdang aser azü tenlaba camp agi

Kohima, Nov. 22 (TYO): National Cadet Corps (NCC)-i küm shia November tatembangbuba hopta Amongnü NCC Day amonger, aser taküm 71buba NCC Day ji November 24 nü lir; iba dak sendakba nung NCC Group HQ Kohima aser Nagaland nung NCC units ajaki social service, awareness campaigns aser sobaliba sentongtem agir, ta Lt Col Sumit Sharma PRO(Defence)-i sangdong ka nung metetdaktsü.
Iba anogomong nüngtem nung Nov. 21, 2019 nü ANOs aser NCC Cadets Tuensang district-i SDRF-i ayongzükba NEPeX exercise nung shilem agiogo; Nov. 22 nüa NCC Gp HQ Kohima den 24 Nagaland NCC company nungi NCC Cadets, 1 Nagaland Girls Battalion aser G Rio Hr. Sec School Kohima-i Kohima Orphanage Home semdanga Orphanage nung alir maongka junga manguba tanurtem ajurua jembi aser chiyungtsü tapu balala aika tenla agütsüogo.
November 22 nüsa NCC Kohima Group-i Kripa Foundation den senteper Naga Hospital Kohima nung azü tenlaba camp ka ayongzüka agi, aser iba sentong nung NCC units balala nungi Cadet 40 dak temai melungsoa azü tenla agütsüogo. Yamaji state tesem ajaklen NCC Cadet temi sentong balala ayonga agidar, ta kasa sangdong nung shia lir.