NCERT-ikechiba Netaji otsü tajemba küma züngtok: CIC

New Delhi, January 24 (Agencies): NCERT-i textbook tem nung Subhas Chandra Bose densema linük nüjiso atema rarar aser lenirtem indang puti otsü ajema kümtsüba atema Central Information Commission (CIC)-i parnok dang tasüngdangba kaa, iba telemtetba agiba atema kuli agüjang, ta metetdaktsüogo.

CIC-i NCERT dang, kechiba Class 12 history kakettem nung Swami Vivekananda indang ojang 1250 aliba nungi kanga ajema küma tangbo ojang 37 dang akum, aser kechiba Class VIII kakettem nungibo khenyongi intok (?) ta tasüngdangba kaogo.

NCERT kakettem nung nüngtugu nisungtem aser nüjiso atema rarartem sentokba anema ola adoka Jaipur nung alir Suryapratap Singh Rajawat-i temepishiba ka agütsüba onükji Information Commissioner, Sridhar Acharyulu ket tongogo.

RTI application balala aser public grievance application ajanga Rajawat-i, linük lenirtem aser nüjiso atema rarar Chandra Shekhar Azad, Ashfaqullah Khan, Batukeshwar Dutt, Ram Prasad Bismil nunger densema parnok 36 indang otsütem NCERT textbook nungi khenyongi intokogo, ta ashi.

Telangzüba tajung ka manguba ajanga pai transparency panel ajurua liasü.

CIC dang Rajawat-i, nüjiso atema rarar takümtem indangbo maden, saka cricket aser süoshi puti otsü atema kaket tapak 37 agütsübaji tim masü, ta ashi.

Paisa nüjiso atema rarar kaket nung densema malirtem  noksa-a sayaogo.

NCERT atema jembir ketdangser kati, temepishiba benoker-i benokba onüktemji Syllabus Revision Committee matsüngdang benoktsü, ta shiogo.