NCERT kaket nung Gaidinliu otsü enoksemtsüla: Ibobi

Guiwahati, August 25 (Agencies): Hombar nü Manipur Chief Minister, Okram Ibobi Singh-i Centre sorkar dang, NCERT kakettem nung Nagaland nungi nüjiso atema rarar, Rani Gaidinliu indang otsü-a enoksemtsüla, ta ashi.
Rani Gaidinliu ya 1915 küm aso aser lai British nunger anema raraba asoshi bilemteter.
New Delhi nung Rani sor küm noklang ka ajungba bilemtetba sentong nung jembidang Ibobi Singh-i Ato kilonser Narendra Modi aser Union culture ministry-i Manipur nungi lenir tushitsü atema benjungmung ayongzükba asoshi tenüngsang agütsü.
Ibobi-i, “Rani Gaidinliu ya India nunger lanurtem ajungmesor ka lir. La ya tetsür tashi asoshi notaker lenir ka lir, aser ibaji asenok ajaki akhümtsübutsüla,” ta ashi.
Manipur chief minister-isa Modi dang Class 1 nungi 9 tashi kaketshirtem NCERT kakettem nung Rani taküm otsü enoksemtsü atema Union HRD ministry dang tuyutsü mepishiogo.
“Iba ya ajanga linük ainba ajungkettsüba dang masü saka tetsürtem tashi-a ajungkettsütsü,” ta paisa ashi.
Ibobi Singh-i, “Rani Gaidinliu sor küm noklang ka ajungba benjungmung ajanga lai nüjiso atema rarabaji ajaki meteta akümtsü,” ta metetdaktsü.