NCF Chennai-i India nung water bird sanctuary tejentiba semdang

Naga Christian Fellowship Chennai nungi lanurtem February 9, 2019 anogo Vedanthangal bird sanctuary semdangba mapang tangokba noksa nung angur.

Chennai, Tsüklai/Feb. 12 (Agencies): February 9, 2019 anogo Tamil Nadu Government nung senior Forest Department ketdangser Limatoshi, IFS-i Vedanthangal bird sanctuary semdangtsü asoshi maongka tulu agütsü, koba university student timba sür Naga Christian Fellowship Chennai (NCF Chennai) nungi züngsemtemi semdanga liasü. Vedanthangal bird sanctuary ya India nung tzü ozütem wazüka ayuba tesem tejentiba lir, kong parnoki arem shiruru wazüka ayutsü indang shisatsü angazüka liasü.
Limatoshi-i ashiba agi, “Iba sanctuary anasa aliba yimdaklirtem ya iba sanctuary aser tashikang aketba ozütem asoshi khuret kanga abener, aser iba tesemi ozütem aruba mapang timtem agütsüba nokdangtsü asoshi mera aika agiogo.”
“Yimdaklirtemi iba sanctuary ya par indang amai bilema anepalur aser iba ajanga küm piyong nung parnok nema tajangzük agütsür. Asenoki alima ajunga ya Eden tsüki ama bilema anepaluti,” ta Limatoshi-isa ayongzük.
Vedanthangal ya India nung ozü wazüka ayuba tesem tejentiba lir aser iba tesem ya Chennai yimti nungi kilometer 75 shi bilar lir. Küm shia migratory season nung ozü 40,000 (tesem aika nung manguba ozü tabu 26 dena) dak tali iba tesemi arur. Ozüsangnu yimya aser parnok libaliru tsütsü iba tesem ya kanga tongtibang ta ajiteta British sorkari Vedanthangal ya ozü wazüka ayuba tesem ka kümdaktsütsü asoshi 1798 küm tetenzüklen mera kar agia liasü aser 1858 küm ozü wazüka ayuba tesem ka ama kümdaktsü.
Naga nunger nem iba tesem semdangtsü maongka agütsüba asoshi Limatoshi aser Tamil Nadu sorkar dang kanga pelar, ta NCF Chennai nung pastor Wapangtoshi-i sangdong ka ajanga metetdaktsü. Iba ama sentong ajanga lanurtem ajungmesoa Nagaland ama state nung arem shiruru wazüka ayutsü lenmang sayur, ta paisa ashi.