NCP Nagaland den yariteptsü mepishir

Kohima, July 5 (TYO): Nationalist Congress Party (NCP)-i democratic tangatetba nung teti nokdaktsü, anungji Nagaland nung alirtemi party nung adentsü mepishir, ta NCP Nagaland-i tanü metetdaktsü.
Bodbarnü tawa tasen shimba NCP Nagaland Convener, Vanthungo Odyuo-i osangbener senden ka nung iba temepishiba metetdaktsü.
State Assembly Election 2018 nung NCP-i takok tajung angutsü aser menden timba ajungkettsü tamang lir, ta paisa ashi.
2008 State Assembly elections nung NCP-i menden 2 nung aser 2013 nungbo menden 4 nung takok angu. Ajisüaka, küm anaprong nung NCP MLA temi tanga party tem den loktep.
“Yimten lennirtemi mapang shia party toktsüba aser melentepba ya tezütangtsü ka lir. Iba inyakyim ajanga nisung kati party tangatetba akhümtsübu masüba sayur aser vote agütsürtemi tamang kaa shimba ashioktsür,” ta Odyuo-isa metetdaktsü.
MLA temi pei party aser vote agütsürtem tsüngdang masetshii nokdaktsüla. Yimten telok melenshibaji ashioktsüba inyakyim ka lir, ta paisa shisem.
Odyuo-isa Nagaland nung vote agütsürtem dang party memelenshitsü aser MLA tem party melenshitsü atema mesüzükba mapa meinyaktsü mepishia metetdaktsü.
Odyuo ya June 10, 2017 nü NCP National President, Sharad Pawar lenisüba kübok Party high command-i Nagaland nung convenor inyaktsü shim. Pa ya NCP Nagaland Convener mesüra President 10 buba lir.
Tanü osangbener den jembidang Odyuo-i NCP mezüng tir asür KV Keditsu, Povotso Lohe aser taoba tirtem aser party mapa inyakertem dang pelaba metetdaktsü.
NCP ya June 10, 1999 nü Sharad Pawar, asür PA Sangma aser Tariq Anwar nungertemi tentetba telok lir. Kasa küm Nagaland nunga asür KV Keditsu Convener sür NCP tenzük, ta tanü Odyuo-isa metetdaktsü.
2003 küm NCP-i Assembly election nung shilem agi aser idangji candidate 2-i takok angu. Ajisüaka, küm asem lir külen MLA anaprongi telok toktsür tanga telok nung aden, ta paisa shisem.
2013 Assembly election nunga NCP candidate 15-i toktep aser parnok rongnung candidate 4-i takok angu, saka June 2014 nung par pezü rongnung asem BJP nung aser ka NPF nung aden, ta NCP Nagaland Convener-isa metetdaktsü.