NCP Tir Sharad Pawar süogo ta olulu adok

Pune, January 26 (Agencies): Nationalist Congress Party Tir Sharad Pawar ya akhi ama mozü kidangi oa temang tendanga liasü aser Mongulbarnü pa süogo ta social media nung olulu prokshiba angashia pa kanga menünüa bilem.
Iba olulu kanga sashia jembiba ajanga Ruby Hospital nung yipten ka nung Pawar amenba video ka NCP-i saya. Pa iba video nung manemer asemba sobutsü anüng sentsü ka semer par jala Supriya Sule, kinüngertem, party nung külemi inyakertem aser osangbenertem den jembia adoka lir.
Video nung arishi küm 76 tain Pawar kanga tashi ita adoka lir. Pa asüba olulu anogo ananü tashi longtepba den Republic Day asüba ajanga pa asüba temai adoka mesangdong ayur aser Bodhbarnü ang nüburtem dang sangdongtsü ta angashia pa kanga menüba kasa video nung lir.
Iba osang angashia Pawar-i tesüiba mapang Ato Kilonser Morarji Desai-i Loknayak Jayprakash Narain masü ser nung süogo ta parliament nung sangoktsüba aser tulur tanga kar-a masü ser nung süogo ta jembiba lemsatep dang paisa, iba amala nisungtemji arishi talangsa alir, ta shisem.
“Shiba masü ser nung süogo ta jembir itemji arishi talanglangsa alir, ta MP, Supriya ashiba NCP executive president Jitendra Awhad-i sayaba video nungji lir.
Pawar ya Deobar anonung tango tera sadema mesahitetba ajanga Ruby Hospital-i anir ao aser yangji temang tendanga mungdar.
Praful Patel, Sunil Tatkare aser Nawab Malik nunger dena party nung lenirtem aika aser tongtibang nisungtem jenti den mozü kidang inyakertemi pa masü kanga junga lir aser anogo ka ana tsüngda nung mozü kidang nungi kidangi aotsü ta iba olulu nembangja liasü.
Taoba mapang Pawar ya Maharashtra nung asemben tashi chief minister liasü aser P.V. Narasimha Rao o Manmohan Singh na Ato Kilonser inyakba mapanga pa centre nung union minister sa inyaka liasü aser 2017 küm agitsü aliba linük Tir shimba election nung pa-a tokteptsü akok, ta osang kar ajanga ashi.