New Delhi, June 10 (Agencies): Kinü tanurtem (baby) atema US nung aliba nüngtugu product company, Johnson & Johnson dang United States (US) nung aliba court aikati, parnok product rongnung ‘talc’ nung anema alibaren atema temkümdangtsü maliba atema tetuyuba agütsüba sülen tanurtem temeten tenteti kati parnok dang item product laboratory nung tendangtsü atema tetuyuba agutsüogo.
National Commission for Protection of Child Rights (NCPCR)-i state pongu- Gujarat, Jharkhand, Assam, Andhra Pradesh aser Madhya Pradesh dang Johnson & Johnson baby powder aser shampoo tendangtsü atema sample bendenang ta tuyuogo.
Taoba ita state tem dangi züluba shidi nung NCPCR-i, Johnson and Johnson-i yangluba product nung ‘asbestos’ aser ‘formaldehyde’ ama carcinogenic substance alitsü südi ta tekümdantsü osangtem lir, ta shia lir.
Iba dak sentakba nung company ketdangser kati, “Sorkar nungi onoki tasüngdangba kecha mangu aser 2015 nungi Johnson and Johnson-i dehydrate amshiba anenogo,” ta ashi.
NCPCR Mendenbuba, Stuti Kacker-i, “Iba ya atangji osang anguba dak sentakba inyakyim ka lir. Asenoki asen chirnurtem kümzüktsüla, aser onoki tai kar danga putetra temerenshi agütsütsü,” ta ashi.
NCPCR-i India nung item state tem dang, Johnson and Johnson product tem sample ji sorkari agizüka aliba laboratory tem nungang tendangtsüla, ta tuyuogo.
Commission-isa state tem dang, shidi agütsüba anogo, May 17, 2016 nungi tenzüka anogo 30 nü tsüngda nungsa tetendangba osangji agüjang, ta tuyuogo.
You must be logged in to post a comment Login