NCS & NPS mapa 73 atema nisung 13,593 tatidang agütsü

Dimapur, Oct. 09 (TYO) : Nagaland government kübok NCS, NPS aser tanga mapatem kar dena mapa ajak agi 73 atema yashi Honibar nü Naga nunger lanurtem parnok ajak agi nisung meyirijang ter asem noklang pongo tukur asem (13,593) mezüngbubaren (preliminary) tatidang agütsüogo.
Iba tatidang ya Nagaland Public Service Commission ajanga tesem 22 nung külemi agiogo. Item tesemtemji Kohima nung 11, Dimapur nung 7, Mokokchung 2, Mon aser Tuensang nung kaka ta agia liasü.
Item mapa 73 rongnungji Secretariat Assistant post 30, Extra Assistant Commissioner (EAC) 15, Deputy Superintendent of Police (DSP) 2, Assistant Election Officer 1, Junior Divisional Assistant 23 aser Research Assistant mapa 2 adoka lir.
Iba tatidang agütsüba mapang tatidang agütsür shinga takdang telongi mobile phone aser yangku kecha bener meyok aser tatidang agiba takdang nung CCTV enoka yur tatidang agiba tepiyongji noksa tangoka liasü. Yashi agütsüba tatidang osang ya ita ana tsüngda agütsütsü imlar.
Tang Nagaland nung zünger mapa bushir Employment Exchange nung tenüng agüja alirtem ajak agi nisung 70,422 aliba osang taoba hopta nung asenoki osangkaket nung züngogo.