NCS (P) aser NSS 48buba Batch Foundation course tenzükogo

Dimapur, Rongchii 24 (TYO): State nung nüburtem tarutsü tia nenok kabu nung lir, aser ATI nung na training agiba aser renemshiba ajanga nai nüburtem ochishia tenzüktettsü, ta Commissioner & Secretary, Abhishek Singh, IAS-i Multipurpose Hall, ATI nung Rongchii (April) 24, 2018 nü NCS (P) aser NSS 48buba batch Combine Foundation Course sentong tenzükba nung tesemdanger tongti ka ama jembidang ashi.
Iba training ajanga nenok wadang nung teyari tulu agütsütsü, ta Abhishek Singh-i officer aser training agirtemi takok anguba tepela lemsatepdang shisem.
Mapa tasen tenzükdang asenoki tanurtem ajak asoshi education, health aser tanga sector nung maongka tajung agütsütettsüsa meranga inyakti. Asen sentongtem ketdangsüa inyakba mapang tetsür tebur mebensai scheme balala inyaktsüla aser iba tangatetba ya asen temulung nung teti alitsüla, ta paisa ashi.
Tesem tezülen alitsü ya jangratemtsü taküm ka masü, saka nai iba mapa inyaktsü mulungtetba asoshi jungjunga shisadangang. Nü nem lemzüktsüba mapa ya maongka ama agizükang aser na yakyaka alutsüsa nü mapa renemang, ta Singh-i Nagaland Civil Service Officer tem ajungshia ashi.
Nagaland Secretariat Service training agirtem dang sorkar inyakyim tajungba kümdaktsütsü asoshi temulung agütsütsüla aser nüburtem nung teyari tajungba agütsütsüla, ta Singh-i ashi.
Secretariat nung department kar nung mapa junga meinyakba indang sasa jembidang, iba amala tesem nung temelenshi arudaktsütsü asoshi inyaktsüla, ta pai ajungshi.
Singh-isa Officer aser training agirtem dang computer amshitsü angazüktsü aser social media akok tashi amshitsü ajungshi.
Iba training indang nükjidong tongtibangtiba ya training agirtem nem sorkar mapa junga ketdangsütsü asoshi tanüla agütsüba aser state nung yimden, lokti aser rongsenketsüng shisatsü angazükdaktsütsü asoshi lir, ta Administrative Training Institute indang Director, R. Asenla Keitzar, IAS-ia kasa sentong nung ashi.
Shisatsü arentsü asoshi tesem balala sema jajaba dak alaka iba training mapang wadang balala nungi yimya balala aliba nisungtem den sensaksemtsü aser metetbelatsü maongka agütsütsü, ta laisa shisem.
Iba training ya nenok shisatsü, temang aser tanüla renema alitsü asoshi agütsür, aser iba atema maongka tajung agütsüstü. ATI nung training agiba mapang sadoksayima alitsü asoshi department-i training agiba stage ajak nung yariteptsü, ta laisa shisem.
Na tang aliba jenjang ya na tekolok chiraba ajanga masü saka Tsüngermer sentong ajanga lir, ta iba sentong ketdangsüa agisang aser Additional Director, ATI, Kevin Zehol, NCS-i tepela o jembiba mapang ashi. NCS (P) aser NSS 48buba batch Combine Foundation Course training agir parnok 45 lir. Additional Director (Training), L. Youdang Jamir-ia iba sentong nung tepela o jembia liasü.