NCS probationer tem Moatsü amung

NCS probationer den ATI officers aser staff tem Multipurpose HAll, ATI Kohima nung Monupii 2, 2018 nü Moatsü benjongmung amungba mapang tangokba noksa nung angur.

Dimapur, Monupii 03 (TYO): Multipurpose Hall, ATI Kohima nung Administrative Training Institute (ATI) ketdangser aser staff tem den külemi Nagaland Civil Service (NCS) probationer tem Monupii/May 2, 2018 nü Moatsü mungogo.
Iba tepela anogo matongdang mapa tasak balala inuaka aser külemkeja liasü, ta Additional Director ATI, Kevekha Kevin Zehol-i iba sentong nung jembidang ashi. Nisung kati pei akok tajungtiba nung bendanga agütsüba benjong ya probationer temi tatidang atema renemshiba den sako lir, ta pai ashi.
Nenok wadang asoshi kin ajak indang benjongbentsü ya tongtibang lir. Probationer ajak pai tata tesem nung lemzüktsüba ya mapa ka asoshi yok. Anungji probationer ajungai tajungtiba nung state aser nüburtem tenzüktsüla, ta Kevin Zehol-isa ajungshi.
Moatsü ya Ao Naga nungertemi alu nung yokba metsüjang aser tsük junga aintsü asoshi tsüngrem dang temoatsü meshiba benjong ka lir, ta EAC (P), Chubasanen Ozukum-i iba benjongmung ratet jembidang ashi. Iba benjong ya mapang aser tesem balala nung munga liasü, saka 1946 küm Dobashi aser Ao Kaketshir Mungdang teyari ajanga British Administrator, P.F Adams-i Aoer ajak dangi iba benjong ya kümshia Monupii/May 1 nungi 6 tsüngta amungtsü totuyuba agütsü, ta pai shisem.
Iba sentong nung EAC (P), Obangnener Jamir-i Moatsü ken aten aser EAC (P), Imtinungla Longkumer-ia Ao-tsür temi sobusolemba indang rasaa ashi.
Iba sentong ya EAC (P), Khiuzan Kaurinta-i ketdangsüa agi aser paisa tarur pela agizükba o jembi. Maneni Kevethito Rose-i tepela o jembi aser Moasunep Sangtam-i sarasadema tembang.