NCSA 43 buba General Conference agiogo

Dimapur, November 21 (TYO) : November 21, 2015 nü Capital Convention Centre nung Nagaland Civil Service Association 43 buba General Conference agi.

Iba sentong nung tongti tesemdangerji Social Welfare & Parliamentary Affairs, Kiyanilie Peseyie liasü aser pai administrative civil service officers ayongzüka o jembi.

State sorkar aser public sector undertakings nung civil service ketdangsertemi tongtipang mapa inyaker aser Nagaland nung NCS ji sorkar atema ketdangsüba kongsang tongtipangtiba lir, ta Kiyanilie Peseyie-i ashi.

State ka nung law & order aser general administration indang tebilemtsüji Civil service ketdangser ka indang khuret lir. Iba denji State sorkar maparen acha-ayangtsü aser sentongtem atongtsü tebilemtsü khuret dena lir, ta paisa shisem.

NCS officers indang shilemji kanga tongtipang aser tesüiba küm 42 tashi NCS ketdangsertemi public atema mapa tulu inyakja arur. Maneni ketdangsertemi sorkar nung mapa inyakba yimya tajungba kümdaktsütsü merangtsüla, ta paisa ayongzük.

Sentong nung tetushi süa jaokerji Chief Secretary, Pankaj Kumar IAS liasü aser paia o jembidang ashiba agi, Sorkar ketdangsübaren nung NCS officers ji tongtiret lir.

Sentong nung mendenji Sharon Longchari liasü, NCSA President, K.S. Anden Konyak-i Tir o jembi, NCS Band-i ken aten aser NCSA Treasurer C. Khanyang Imlong-i anküp tepela o jembi.

2016-2017 kümsük atema Nagaland Civil Service Association mendenpur tasen shimba:

President :  Kevekha Kevin Zehol

Vice president :   Asangla Imti

General Secretary :  Akuno S. Meyase

Jt. Secy :  T. Yanvuthung Kikon

Jt. Secy :  Keyirangding Heigui

Treasurer :  C. Khanyang Imlong

Asstt. Treasurer :  Andrew C. Imti